Mipuiin Har Ghar Tiranga an zawm ṭha ; Hnam puanzar 2,00,000 vel hralh a ni

India ramin zalenna a hmuh champha vawi 75-na lawmna atana in tina hnam puanzar zár vek tura mipui ngenna, Har Ghar Tiranga chu Aizawlah pawh mipuiin an zâwm ṭha thawkhat a; Mizoramah hnam puanzar 2,00,000 vel tihral a ni.

Sorkar laipui chuan India ram zalenna champha vawi 75-na lawmna kal mek pualin August 13-15, 2022 inkar, ni thum chhung chu sorkar pisa mai bakah, mimal in leh dawr hmunahte hnam puanzar zár turin a ngen a, Mizoramah pawh kalpui a ni.

Vanglaini palaiin August 13, Inrinnia Aizawl khawpui a fan kualnaah, sorkar pisa tinah hnam puanzar zàr a ni tawh a, mimal in leh dawr hrang hrang bakah, khawlai leh lirtheiahte pawh zàr a ni.

Har Ghar Tiranga kutken turin Mizoramah chuan Art & Culture department ruat a ni. Art & Culture director R Hmingthanzuala sawi danin, hnam puanzar an chah chu district hrang hranga Bawrhsap pisaah an lo thehdarh tura thawn a ni a, Aizawlah chuan Aizawl Municipal Corporation kutah dah a ni. AMC chuan local council kutah pe chhuakin, retailer-te hralh tir a ni a, hmun dang 18 aṭangin hralh a ni bawk.

Art & Culture Director chuan zawhna chhangin, Har Ghar Tiranga pualin Kolkata-ah hnam puanzar 2,00,000 chah a ni a, hralh zawh vek a ni-ah an ngai tih a sawi.

R Hmingthanzuala chuan, hnam puanzar hralhnaah hian hlép an nei lo a, Kolkata aṭanga pakhat Rs 20 zela lo thleng anga chhût chu Rs 20 bawkin hralh chhuah leh a ni tih a sawi a, "Hnam puanzar hralhna aṭanga sum hmuhte chu revenue receipt-in Finance department-ah kan thehlut ve leh ang," a ti.

Art & Culture Director chuan, sorkar laipui thupek ang chuan hnam puanzar chu August 13, Inrinni aṭanga vawiin Thawhṭanni ni tlâk thleng zar tur ni mah se, tun kár tìr aṭanga zárte pawh an awm a, a lawmawm lamah an ngai tih a sawi.

Hnam puanzar chu tun hma chuan sorkar mi pawimawh bik (VIP)-te chauhin an tár ṭhin tih sawiin R Hmingthanzuala chuan; tun ṭumah erawh chuan Har Ghar Tiranga campaign neih tur avangin June thla khan hnam puanzar chungchanga dan ding lai siamṭhat a nih thu leh in tina zàr tur leh zanah pawh zàr theih tura ruahman a nih thute a sawi.

Art & Culture Director chuan, "Campaign hi hnam inpumkhatna leh mipui thinlungah ram leh hnam hmangaihna a pian a, mipuiin hnam puanzar hlutna an lo hriat theihna tura duan a ni. Hei hian Mizoramah pawh a ṭha zawnga nghawng a neih a, mipuiin hnam puanzar hlutna an hriat thar ngei beisei a ni," a ti.