Independence Day lawm dawn; Governor-in thuchah a ti chhuak

Vawiin hi India Independence Day vawi 76-na a ni a, India ram pumah lawm tur niin, Mizoramah pawh lawm a ni dawn. Governor Dr Hari Babu Kambhampati chuan Independence Day pual hian nimin khan thuchah a ti chhuak.

Mizorama I-Day lawmna pui ber, Aizawlah chuan Lammualah lawm tur niin, zing dar 8-ah ṭan a ni dawn a, chief minister Zoramthanga’n hnam puanzar pawt pharhin thuchah a sawi ang. Dy. chief minister Tawnluia chuan Khawzawlah a hmanpui dawn.

Mizoram sorkar chuan hmun hrang hranga Independence Day vawi 76-na lawmnaah tel ṭheuh turin mi tin a sáwm a, sorkar hnathawkte chu tel ngei turin a hriattir.

Governor chuan Independence Day pualin Mizo mipuite duhsakna chibai a buk a, "He hun pawimawh bik a lo thlen hian kan ram leh hnam din chhuahna atana zalenna sualtute inpekna thuk takte kha kan hre thar leh a ni. Pawnlammi, min awp bettute laka zalenna hlu tak min sual chhuah sak avangin an chungah kan lawm em em. Tunah chuan India ram chu khawvela mipuite thuneihna leh an aiawh roreltu atana an thlanna ram lian ber a lo ni tawh a ni," a ti.

Mizoram governor nihna a chelh aṭanga kum khatna a tlin tawh thu sawiin Dr Hari Babu Kambhampati chuan, "He hun rei lote chhung hian Mizoram hmun hrang hrangte fangin khua leh tui te nena inkawmna hun ṭha tak te ka nei ṭhin. Hmasawnna hnathawh tam takte leh hmasawnnate ka hmuh rualin kan ṭan lakna tur kawng tam takah ka hmu tel a ni," a ti a, Mizoramah hian theihna nasa tak awm mah se, theihnate hi a hlawk tur anga an la khawrh chhuak loa a hriat thu a sawi.

Larsap chuan pawimawh a tih pahnih tarlangin, "Pakhatnaah chuan kawlphetha siamchhuah hi kan hmalakna pawimawh ber zingah kan dah a ngai. Keini state lian vak lo, kawlphetha siamchhuahna tur tuiluang chakna chhawr tur ngah si hi chu kan intodelh thei a ni. A pahnihnaah chuan central welfare scheme ṭha takte hi Mizoram mipuite'n kan hre lo hi ka vei em em a ni. Beneficiary tam takin heng ṭanpuina sumte hi an chân mek a, hemi kawngah hian kan harh a ngai," a ti.

India ram zalenna champha 75-na lawmna ( Azadi ka Amrit Mahotsav) neih mek a nih thu sawiin Governor chuan, "Hemi puala Prime Minister-in ram intodelh a India ram siam tura khua leh tuite hnenah chona leh sawmna a chhawp chhuah hi a ropui ka ti. India ram intodelhna tur chuan kan awmna a piangah leh kan theihna zawnah ṭheuh ṭan kan lak a ngai a ni," a ti a, Mizoram pawhin India ram a lo ropuina atan leh a intodelhna tur atan hian thil ropui tak a tih theih thu a sawi.

Governor chuan, zalenna ni lawmnaah hian rilruah ram zalenna sualtute'n ram tana thil ṭha nia an hriatte leh an duhthusam te kha vawn nun thar zel a duh thu sawiin, "Chi hrang hrang kan inpumkhatna hi kan chakna tih hi kan hre reng dawn nia. India ram hmasawnna atan khua leh tuite theih tawpchhuah zel turin kan in chah nawn leh bawk a ni. Zoram mipuite, Independence Day hlim taka hmang ṭheuh turin duhsakna ka hlan a che u," a ti.