Chawngteah I Day boycott dawn

Chawngte Group YMA leh Central Young Chakma Association (CYCA) hruaitute Group YMA president ZD Ramngamzauva kaihhruaia ṭhukhawm chuan, sorkarin an khua a ngaihsak loh avanga lungawi lohna lantir nan vawiina Independence Day vawi 76-na lawmna boycott an rêl.

YMA leh CYCA-te hian August 8, 2022 khan khawtlang mamawh hrang hrang Mizoram sorkara an thlen tawh chhanna engmah a awm loh avanga lungawi lohna lantir nan kawng an zawh a, hemi ni hian SDO (C) hnenah memorandum an thehlut nghal a ni. An mamawh an thlenah sorkar aṭanga chhanna duhawm an hmuh loh avangin Independence Day boycott hi an rel a ni.

Kawngzawh ni-a an sawi tawh angin India ram zalenna ni August 15 lawmna programme Chawngtea hman tur chu dan an tum a ni. Mizoram sorkar aṭanga chhanna duhawm, lungawi thlak an dawn hma chuan he an hmalakna hi kaltlangpui an tum.

Ruahmanna an siam dan chuan SDO (C) pisa kawt aṭanga Independence Day lawmna hmanna tur Baganpara Helipad panna kawngah pungkhawmin, a kal turte an dang dawn.