Kawng siamṭhat phutin kawng dan a ni ; A dangtute'n sorkarah ngenna an thlen

Mamit panna kawngpui national highway (NH) 44A, Dampui khaw hnuai chu June, 20, 2022 leimin vanga kawng ping tihtlang lawk a nih loh avang leh a hêlna kawngpui lirthei kal harsa khawpa a chhiat avangin August 13, 2022 aṭang khan Mamit pêngah kawng dan a ni.

Mamit district-a pawl panga - Mamit District Truck Owners Association, Mamit District Driver Association, Mamit District Ṭhalai Pawl, Mamit Maxi Cab Welfare leh Mamit Pick-up Owners Association chuan ruahmanna an lo siam lawk tawh angin August 13 zing dar 5 aṭang khan Mamit pengah kawng hi an dang ṭan a, sorkara ngenna an neihte Mamit SDO (Sadar) hnena an thehluh hnuah nimin tlai dar 4:30 khan kawng dan hi tihtawp a ni.

Mamit aṭanga thudawn danin, June, 20-a leimin avanga Dampui khaw hnuaia kawng ping hi hun rei tak chhunga sial tlang lohin a awm a. Kawng ping hi Dampui khaw chhung aṭanga hel ṭhin a ni a, a helna kawng hi a chhe hle a, lirthei tan tlan a harsa a ni. Lirthei tê chi tan leh lirthei ke pali a hai chi (4x4) tan lo chuan kal a harsa hle a, nawr chhuah leh hnuhchhuah ngai eng emaw zat an awm tawh.

Dampui khaw chhung aṭanga kawng hel chu lirtheiin a tawrh bakah, sumdawng lirtheite tan phei chuan a hlawk lo hle a ni. NH 108 leimin avanga kawng ping a tlang hun nghakin, lirtheite chu hun eng emaw chen Dampui khaw chhung aṭangin an tlan ṭhin a, mahse kawng ping titlang tura hnathawh a muan em avangin kawng hi dan a ni ta a ni.

NH 44A kawng chhiatna Dampui khaw hnuai hi August 13 vek khan Mamit DC Lalnunhlua leh official dangte'n an tlawh a, tlai dar 3 velah kawng hi tihtlang n imah se, ping leh nghal mai thei dinhmunah a din avangin lirthei tan a him lo a ni.

Kawng dangtute ngenna :
1) Dapchhuah leh Dampui Bazar kai NH44A kawng ping paih fai nan hian JCB pahnih, excavator pahnih leh truck paruk
2) Dampui kawng hlui repairing ṭha leh chak taka thawh a nih theih nan hian kan MLA hian chak takin hma min lakpui sela, a ṭul a nih chuan kawng siamṭhat hna chak zawka thawha nih theih nan awmze nei taka road block min siamsak turin kan ngen
3) Dampui leh Dapchhuah inkarah hian motor tan avanga khualzinten harsatna an tawh lohna turin furpui chhung tal hian JCB a ṭul hun apianga koh theih turin 24 hours duty min dahsak turin sorkar kan ngen