MLA in 4th IR Bn. Hqrs. awmna sawi chian phût

Hachhek bialtu MLA Lalrindika Ralte chuan August 13, Inrinni khan thuchah ti chhuakin, 4th IR Bn. Headquarters awmna sawi chiang turin Mizoram sorkar a phut.

Lalrindika Ralte chuan, Mizoram sorkar thuchhuahin 4th IR Bn. Hqrs. awmna hmun chu Luangpawl, Mamit anga a tarlan thu sawiin, "Mizoram sorkar hian 4th IR Bn. Hqrs. atan ka bial chhung Rengdil khua hi official-in a puang tawh a, a hmunhma tur pawh mi tlawmngaite'n a thlawnin an ram an lo pe tawh a ni. Building-te pawh sain, hmalakna engemaw chen Mizoram sorkarin a kalpui tawh. Tunah hian sipai pawh eng emaw zat an awm mek a ni," a ti.

4th IR Bn. Hqrs. lungphum pawh April 3, 2013 khan Rengdilah hian khatihlaia Home minister R Lalzirliana'n a phum thu sawiin Lalrindika chuan, "Mizoram sorkarin 4th IR Bn. Hqrs. atana ka bial chhunga mi Rengdil a puan fel vek tawh hnua tunhnaia sorkar press release meuha Luangpawl, Mamit anga puan a ni leh ta mai hi tih sual palh a nih ka ring," a ti a, sorkar thuchhuah hi Hachhek bial mipuite leh tlawmngaia a thlawn an ram petute rilru na taka siam theihna a nih thu a sawi.

Hachhek MLA chuan sorkar thuchhuah tihdikna mipui hriata puang chhuak tura Mizoram sorkar ngenin, "Chutiang ni lo a, mipui hriat loha sorkarin 4th IR Bn. Hqrs. chungchanga thutlukna dang a lo siam leh a nih pawhin zep loa, Mizoram mipui hmaa thudik puang chhuak turin Mizoram sorkar ka ngen nghal a ni," a ti.