CM-in TZP zirlai thar lawmna a hmanpui ; Zirlaite ruihhlo leh vaihloa fihlim turin a chah

Tuipuiral Zirlai Pawl chuan August 13, Inrinni khan Chanmari YMA Hall-ah zirlai thar lawmna hun an buatsaih a, an hun hmanpuitu chief minister Zoramthanga chuan zirlai kalkhawmte chu zu, ruihhlo, vaihhlo leh a kaihhnawih laka fihlim turin a chah.

Zoramthanga chuan cancer vei tam zawnga India rama Mizoram dinhmun thlak a nih dawn chuan hriselna atana ṭha lo chi hrang hrang tlansan ngam a ṭul tih sawiin, "Kan nih theih leh tih theih turte ni thei lo, ti thei loa min siamtu a ni tih hre renga nun uluka invawn a pawimawh," a ti a, zirlai tharte'n châng bulthar an ṭan chu mawi taka a tlipna an siam ngei a beisei thu a sawi.

Tuipuiral Zirlai Pawlte'n an bial chhung hmasawnna ngai pawimawha an hmalakna chu lawmawm a tih thu sawiin Chief Minister chuan, "Hmawsawnna ruhrel dinah pawh a ṭul leh mamawh angin sorkarin theihtawp a chhuahpui zel ang che u," a ti.

Khualzahawm, bialtu MLA Ramthanmawia chuan, zirna in hma a sawn theih nan kawng hrang hranga sorkarin hma a lak dan leh, a bik takin a bial chhunga zirna hmasawnna kawnga TZP-te ṭawiawmna chu lawmawm a tih thu sawiin, "Mi entawntlak tak tak leh eizawnna kawnga chhuanawm tak tak an lo chhuak zelte a lawmawm. Hmasawnna hmuh zel ka beisei," a ti a, zirlai kalkhawmte chu an awm dan leh Pathian thu lo inmawi tir zel turin a chah.

Inkhawmah hian HSLC leh HSSLC exam 2022-a distinction-a pass mi pali hnenah MLA Award hlan a ni a; hemi atan hian Bialtu MLA chuan laptop a pe a ni.