Tunlaia kawngpui chhe lutuk hi Sorkar inthlahdah vang - MPCC

Mizoram Pradesh Congress Committee (MPCC) chuan thuchhuah siamin, tunlai hian Mizoram hmun hrang hrangah kawngpui chhe lutuk avangin harsatna hrang hrang mipuiten an tawk nasa hle nia tarlangin, "Hei hi sorkar inthlahdah vang a ni," an ti.

Kawng a chhiat avangin hmun ṭhenkhatah chuan mipuiten kawngpui an dang hial nia tarlangin MPCC chuan, "MNF sorkar hnuaiah kawngpui a ṭha ṭhin, tih uang taka sawi ṭhintu MNF-te thuneihna chan laia hetiang thil a thleng hi an chapo vang leh sorkar inthlahdah hrim hrim vang niin kan ngai," a ti a, an sorkar laia kawngpui chhiat chhan chu namen loa ruahtui a tam vang niin an tarlang.

MPCC chuan an sorkar laiin kawng siamna hnathawhna hun (working days) a tlem tih tarlangin, "Duh angin sorkarin kawngpui an siam thei lo. Science and Technology department, Govt of Mizoram-in a chhinchhiah danin Congress sorkar tawp lam kum thum chhung kha a zawn zatin ruahtui mm 2,000 chuang a tla a ni," an ti.

MPCC chuan kum 2015-ah mm 2412.3, 2016-ah mm 2161.8 ruahtui a tla tih tarlangin, "Kum 2017 phei chu state kan nih hnua ruahtui tlak tam ber kum record a ni a, ruahtui mm 2686.7 a tla a ni," an ti a, kum 2017 chu kum 50 kalta chhunga Tlawng lui lianin a chim san ber kum a nih vangin Sairang VC-te'n hriatrengna lungphun an siam hial thu an tarlang.

Ruahtui a tam avang khan kawngpui siamna tura Congress sorkar sum dah sa, cheng nuai 8595.19 pawh hmanna hun a awm mumal ta lo nia tarlangin MPCC chuan, "MNF sorkar lo piang khan a rawn hmang ta char char a ni. MNF sorkar lo piang hian kawngpui siamṭha turin vanneihna nasa tak an nei a. Congress sum dah sa an rochun bakah khua a tuihul ṭha em em a ni," an ti.

MPCC chuan Zoram hmun hrang hranga kawng chhiat vanga sumo service tih tawp thawm awm ta chu MNF sorkar hian chhuanlam tur a nei lo nia tarlangin, "Sorkar inthlahdah vang liau liau a ni. Assembly House-ah Mizoram kawngpui ṭhat avanga lawmthu sawina resolution an pass hial tawh avangin, kawng chhiate hi siam ṭha vat vat se la, an siam ṭha thei lo a nih chuan zahna chang hre turin kan chah a ni," an ti.