KHAWTHLIR

Thisen pe
KṬP, Electric Veng Bial, Aizawl chuan August 13, Inrinni khan Electric Vengthlang Kohhran hall-ah thisen pek an huaihawt a, Synod Hospital blood bank tan thisen unit 51 an pe a, petute mipa 48 leh hmeichhia pathum an ni.

Dy. CM-in hawng
Khawzawl District Child Protection Unit (DCPU) pisa, Khawzawl Vengthar ami chu dy. chief minister Tawnluia'n August 13, Inrinni khan a hawng. Tawnluia chuan, nu leh pate hnena harsatna sawi ngam lo leh naupang an awm ṭhin thu leh nu leh pate pawhin an fate enkawlnaah harsatna an neih fo ṭhin thu sawiin, "Nu leh pate inkara awl hnawhkhahna tur chuan DCPU office hi a pawimawh dawn hle," a ti. DCPU pisa-ah hian thawktu mi 12 an awm.

Ruihhlo man
August 13, Inrinni khan Mizoram Police hnuaia CID (SB) leh Assam Rifle ṭangkawp chuan Jonathan Saizuala Sailo (38), Gosen Veng (Durtlang North) te chenna in an dap a, pseudoephedrine mum 10,000 an man. Pseudoephedrine hi international market-ah cheng nuai 40 man hu a ni.

Walkathon buatsaih
India Independence vawi 75-na champha lawmna Azadi Ka Amrit Mahotsav pualin LESDE department chuan August 13, Inrinni khan 'Youth Skills for a Better Tomorrow' tih thupui hmangin Walkathon For Skill Development an buatsaih a, LESDE secretary Lalramsanga Sailo-in a vai liam. Walkathon-ah hian zirlai leh zirtirtu 150 an tel.

Pandal sa ṭan
Mizoram UPC kohhran ṭhalai pawl, General Pentecostal Youth Department chuan, kumina an khawmpui neih tur pualin Inrinni khan pandal sak hnatlang an nei ṭan. PYD conference hi Mizoram UPC Assembly Centre, Zonuam, Aizawl-ah September 23-25 chhungin neih a ni dawn.

Mela khar
August 12, 2022 aṭanga Millenium Centre exhibition hall-a neih Eat Right Mela chu August 13, Inrinni khan khar a ni. Mela-ah hian stall zawng zawng hnawhkhah vek niin, programme organiser Confederation of Indian Industry leh Young Indians hotute chuan an rin phak baka a hlawhtlin thu an sawi.