Mizoram sorkar hnathawk tan Sorkar sum 36.2% hmang: Sawta

Finance minister Lalsawta chuan, Mizorama sorkar hnathawk tan sorkarin sum a hmang nasa hle tih a sawi a; sorkar sum neih 36.2% vel sorkar hnathawk tana hman a nih thu a sawi.

Lalsawta hian, Inrinni zinga a bial, Armed Venga YMA Audito­rium sak thar a hawnnaah Mizo­ram sorkar tan sorkar hnathawk lak a harsat tawh thu sawiin, "Sorkar laipuiin pawisa a neih zaa pasarih vel a hnathawkte tan a hman laiin, Mizoram sorkar chuan sum a neih zaa 36.2 a hnathawkte tan a hmang a ni," a ti a; sorkar hnathawkte tana sum sên a tam avangin Mizoramah chuan thawktu lak a harsat tawh thu a sawi.

Lalsawta chuan, SAD hnuaia peon, a nghet loa thawk tur lak tur pawh mi 2,324-in an dil a, chu'ng zingah chuan B.A leh M.A eng emaw zat an tel thu sawiin, "Hetiang hi kan ram dinhmun a ni. Sorkar tan hna siamsak vek chi a ni si lo," a ti a; sorkar tan hna siam zung zung âwm tak a nih rualin, tun dinhmunah chuan tih theih a nih loh thu a sawi.

Finance Minister chuan NLUP chu thil kal mek a nih thu sawiin, "CAG report lamah chuan NLUP a hlawhchham lailet dêr ang deuha tarlan a ni. A hlawhchham lailet dêr ti turin hun a la kal tam lo hrim hrim. A ṭhenin ṭhelret, serthlum, leh a dangte an chíng a, hlawhtlinna hmuh a la hun lo," a ti.

Finance Minister chuan, mi tam tak hna thawh tur hre lo leh thawh ngaihna pawh hre lo, chhungkaw tana mi pawimawh tak tak an tam thu sawiin, "Heng mite hi an puak keh mai ang tih a hlauhawm. Tuna kan ram dinhmun tur hi sorkar chuan a hmu lâwk a, chuvangin NLUP pawh hi duan a ni," a ti.

Sorkar policy thar, NEDP siam a nih chhan sawifiahin Lalsawta chuan, "NEDP hi NLUP nena ṭang dun tura tih a ni. NLUP hi kan sorkar chhung chuan kan kalpui zel dawn. NEDP leh NLUP hmangin hna thawh tur lama harsatna awm mek chinfel ngei kan tum," a ti.

Finance Minister chuan, YMA chu mipuite ta a nih thu sawiin, "YMA chuan mi harsate a ṭanpui ṭhin. Hruaitute chu an inthlak leh mai ṭhin a, chuvangin YMA hi mipuite tan a ni ngawih ngawih. Mipuite rawngbawlna hmun tur auditorium din a ni hi a lawmawm hle," a ti a; Mizoramin tlawmngai pawl ṭha tak tak a nei chu lawmawm a tih thu a sawi.

Armed Veng YMA auditorium hawn inkhawm kaihruaitu Z Lal­chhuanawma, president chuan, YMA thil tih chu a ṭha tur a ni tih rilru pu chunga auditorium an sak thu a sawi. Auditorium hi bialtu MLA fund cheng nuai 12 leh hmun dang aṭanga hmuh hmanga sak a ni.