Mission Vengthlangah CCTV hawng

Mission Vengthlang Local Council-in an veng chhunga closed circuit telivision (CCTV) an vuah thar chu, Inrinni zing khan bialtu councillor Lalhmingmawia'n a hawng. CCTV vuah nan hian Rs. 7,00,000 sen a ni.

CCTV hawnna inkhawm, LC House-a neihah councillor Lalhmingmawia chuan, veng chhung himna atan YMA duty awm ṭhin mah se, zan rei tak hnua misual che fo ṭhin venna leh veng chhunga thil thleng hrang hrangte hriat chian a nih theih nan CCTV chu vuah a nih thu a sawi.

Lalhmingmawia chuan, CCTV bunna atan sorkar leh AMC aṭangin sum hmuh a nih loh thu leh, mi ṭhahnem­ngaite inpekna veng mipuite ṭanrualna vanga puitling thei a nih thu a sawi. Bialtu MLA Vanlalzawma pawhin, Mission Vengthlang LC thil tih chu veng dang tan pawh entawntlak tak a nih thu a sawi bawk.

CCTV camera hi hmun paliah an dah a, Pan-tilt zoom camera pathum leh bullet camera pali an vuah a, vuah belh zel an tum a ni.