Damdawi man tlawma zawrhna hawng

Dinthar, Aizawla damdawi man tlawm zawrhna dawr thar, Jan Aushadhi Store (Generic Drug Store) chu Inrinni khan Health minister Lal Thanzara'n a hawng.

Lal Thanzara chuan, mipui mimir ban phâk tura man tlawm zawka damdawi zawrhna hawn a ni leh ta chu lawm­awm a tih thu a sawi a, "Mizorama district hospital tinah Generic Drug Store hawn a nih theih nan hmalak mek a ni. Mipui hrisel nan sorkarin theihtawp a chhuah a, India ram state lian leh hausa zawkah pawh doctor pakhatin a enkawl tura tih zat an zawm thei lo a, state rethei zawkah a harsa lehzual," a ti.

Sorkar thuchhuah tarlan danin, Jan Aushadhi Store-ah hian damdawi dawr pangngai aia a lêt thum/li vela man tlawm zawkin damdawi lei theih a ni. Damdawi chu a man to dan azirin category pathum - A, B leh C-ah ṭhen a ni a; a man to chi chu A, a laihâwl B, a man tlawm chi C tia bithliah a ni. Jan Aushadhi Store-ah hian hian group B thleng phak damdawi a awm mang lo.

Damdawi dang man to chhan ber chu a tuamna (packaging) leh a cheimawinate a ni a, a man tlàwm vanga quality chhe chuang lo Jan Aushadhi damdawite chu a man a tlawm theih nan a tuamna man tlawm zawk, him tawk si, a chei mawina tel lo hman a ni.

Damdawite chu Na­tional Accreditation Board for Testing and Calibration Laboratories (NABL) pawmpui laboratory-ah a ṭhat leh ṭhat loh uluk taka enfiah vek a ni bawk.