Lunglei-Tlabung NH-302 thawm ṭha mek

PWD chief engineer (Highways) K Lalsawmvela chuan Mizoram chhim lama kawngpuite a enfiah. Lunglei-Tlabung kawng, NH-302 chu cheng nuai 85 hmangin thawm ṭhat mek a nih thu a sawi.

PWD Chief Engineer hian July 7, Zirtawpni khan Lunglei-Tlabung kawngpui, NH-302 chu a hmunah kalin, kawng thawm ṭhat hna thawh kal mek leh hmalak zui zel dan turte an enfiah a ni.

July 8, Inrinni zing khan Lungleia PWD IB-ah K Lalsawmvela hi chanchinbumite'n an kâwm a; zawhna chhangin, Lunglei- Tlabung kawng siam ṭhatna tur sum Mizoram sorkarah an dil a, Mizoram sorkarin cheng nuai 85 a pek hmangin kawngpui chu thawm ṭhat mek a nih thu a sawi.

K Lalsawmvela sawi danin, Lunglei-Tlabung NH-302 thawm ṭhat hna thawk tur zawn nan tender chhuah a ni a; km. 0-30 chin chu contractor pek tawh niin, kawng siam turin an inbuatsaih mek a, April 2018-ah blacktop zawh hman beisei a ni.

Km. 30-60 inkar chu ṭum thum tender a nih hnuah pawh mi pakhat chauin a chháng ṭhin a, a chhangtu awmchhun RV Hluna, Aizawl hnenah pek niin, Ministry of Road Transport & Highways pawmpui turin thawn mek a ni. Km. 60-94 inkar siam hna chu JP Project pek a ni a, anni hian lei (bridge) ṭhat tawk loh avangin khawl lian an la phur thleng thei lo.

Tlabung kawnga Phairuang lei leh Tui-chawng lei chungchanga zawhna chhangin K Lalsawmvela chuan, Phairuang lei chu kum 38-a upa a ni a, tunah chuan a chhe tawh hle tih a sawi a, "Tunah hian dawh ṭha turin buaipui a ni a, Aizawl aṭangin Guwahati lamah thawnin, anni'n Delhi lam pawmpui turin an thawn a, ûm zui vat a ṭul dawn a ni," a ti.

PWD Chief Engineer chuan, Phairuang lei chu dawh ṭhat a nih pawhin, NH-302 double lane-a siam turin a ring thei dawn tih a sawi a; Tuichawng lei chu tuna hmun ngaiah ni lo, kawngpui thar kalna lama dawh a ngaih dawn avangin tunah chuan dawh ṭan mai theih a nih loh thu a sawi a ni.

K Lalsawmvela chuan, Mizoramah national highway 11 a awm mek thu leh, NH-te chu kum li danah resurfacing tih zel tur a nih thu a sawi a; Aizawl-Lunglei World Bank Road chu sum a awm loh avangin kum riat hnuah pawh resurfacing tih theih a ni lo tih a sawi bawk.