Mamit NGO-te'n an district hospital-ah Doctor pahnih dahsak turin sokar ngen

All NGO Coordination Committee, Mamit chu Inrinni khan Sub. Hqrs. YMA committee room-ah an ṭhukhawm a, an district hospital-ah doctor pahnih tal dah belh sak turin an ngen.,

Mamit NGO chuan doctor indaihlohna hria a, MPSC kaltlanga Mizoram sorkarin doctor an la thar chu lawmawm an tih thu sawiin, "District Hospital-a doctor kan neih mekte hmun danga transfer an ni pawh hi ui hle mah ila, Mizoram sorkarin anmahni thlaktu tur doctor ṭha tak min pek avangin lawmthu kan sawi a ni. Doctor rawn thawk thar turte hi lawm taka pawmin district mipui te tan an thiamna leh finna te hmang turin duhsakna kan hlan a ni," an ti.

Hetihlai hian Mamit NGO chuan an district hospital chuan district hospital zinga doctor nei tlem berte zingah an tel thu tarlangin, , "Hetiang a nih laia doctor pakhatmah pek belh kan ni lo hi pawi kan, tiin vanduai-thlak kan ti hle. Tunah hian kan district hospital-a doctor pali dah belh tura tih nimah se, Mamit damdawi-ina thawk mek doctor pathumte chu hmundangah transfer an ni a, tuna doctor dah belh zinga mi pakhat chu kum tam tak lo thawk tawh, la thawk lai reng a ni," an ti a, khawthlang mipuite hriselna ngaipawimawh a Mamit damdawiinah doctor pahnih tal dah belh sak turin sorkar an ngen.

Mamit NGO chuan, an district chhunga mi Marpara PHC chuan hun rei tak aṭanga doctor an neih tawh loh laiin, tuna doctor lak thar zingah doctor dah tumna a awm lo tih tarlangin, "Mamit district chhunga mipuite hriselna ngai pawimawh a, Marpara PHC-ah doctor min dahsak nghal tur-in thuneitute kan ngen bawk a ni," an ti.