Thlai zuarte ID leh dawhkân sem

Inrinni zinga Tuikual South huam chhunga Horticulture leh Agriculture directorate building kawt vela chawhmeh zuarte felfai zawka enkawl an nih theih nan, July 8, Inrinni khan Aizawl Municipal Corporation (AMC)-in dawhkân leh identity card a sem.

Dawhkan leh ID card sem inkhawm hi Horticulture directorate conference hall-ah neih a ni a, bialtu councillor R Thanglura chuan, Inrinni tûka chawhmeh zuar ṭhinte chu an bawlhlawhte kalsan mai lo a, fai taka thian ṭhin tur leh an bula mite ngaicháng chunga harsatna siam lo zawnga awm tur te, AMC-in kaihhruaina a siamte zâwm turin a chah.

AMC chhinchiah danin, Inrinni zinga Tuikual South huam chhung, Horticulture leh Agriculture directorate building kawt vela chawhmeh zuar ṭhin chu mi 144 vel an ni a, an vaiin kum khat atan license pek niin, an hman ṭangkai tuirin ID leh dawhkân pek leh an ni.

Ruahman dan chuan, chawhmeh zuara ṭhute chuan ni khatah Rs. 50 an chawi dawn a, Rs. 20 chu AMC-ah a lut ang a, Rs. 30 chu fee khawntu tur Tuikual South Local Council-ah a lut ang.

AMC hian Aizawl khawpui hmun danga vending zone hrang hrangte pawh zir chiangin, felfai zawka enkawl dan tur an ruahman a ni.