Haulawngah SAGY meeting buatsaih

July 7, Zirtawpni khan Lok Sabha MP CL Ruala'n model village atana a thlan, Haulawng-ah Saansad Adarsh Gram Yojona (SAGY) meeting neih a ni.

CL Ruala chuan, model village-te chu faina, hriselna, thianghlimna leh ei leh barah khaw dang tana entawn tlak ni tura buatsaih tum a nih thu a sawi a, "Model Village atan bik hian a hranpaa sum dah a awm hran lo a, Rural Development leh department hrang hrangte ṭhahnemngaihna aṭanga thawh a nih chuan Model Village ṭha tak din theih a ni," a ti a, Haulawng mi-puite chu neitu rilru púa khaw nuam tak siam tuma ṭan la ṭheuh turin a chah.

Bialtu MLA PC Lalthanliana pawhin thu sawiin, Haulawng khawchhungah hmasawnna tam tak hmuh tur a lo awm ta tih sawiin, "Khaw-chhung inkalpawhna kawngahte pawh Mizo-ram ngaihtuahin a tha ber pawl a ni ang. Model Village ni tur chuan nun changkang nei tur leh hmasawnnaah sorkar sum ring mai loin tih theih kan nei ve a ni tih hria a theihtawp chhuah a ngai a ni," a ti.

Meeting-ah hian SAGY state nodal officer K Lalrinzuali chuan SAGY kalphung leh a awmziate sawiin, "He scheme danglam bikna chu mipuite'n an khaw-tlang mamawhna ang zela hma an lak vena a nih vang a ni" a ti a, SAGY tum ber chu khaw awmsa Model Village ni tura scheme mila siam a nih thu a sawi.