Ṭhuampui-Tuirial kawng siam thuai phût

MPC party ṭhalaite chuan, NH-54 kawngpui, Ṭhuampui leh Tuirial inkar chu buaina leh harsatna lian zawk a thlen hmaa siam ṭha thuai turin sorkar an phût.

MPC ṭhalaite chuan July 7, Zirtawpni khan Ṭhuampui leh Tuirial inkar National Highway-54 kawngpui a hmunah kalin an enfiah a; kawngpui siamṭhat phûta February 23, 2017-a NH-54 kawngpui dan a nih hnua Mizoram sorkarin kawngpui chhia siam ṭhat a intiamna chu bawhzui a nih loh thu an tarlang.

MPCY chuan, Undivided Zemabawk Joint NGO Committee hruai-tute an kawmnaah, an president Lalrinmawia chuan, Undivided Zemabawk Joint NGO-in Ṭhuampui leh Tuirial inkar NH-54 kawngpui chhia vanga lungawi lohna lantir nan leh siam ṭha tura sorkar kar nana February 23, 2017-a NH-54 an dan vanga Mizoram sorkarin siamṭhat a intiamna chu bawhzui a nih loh thu a sawi niin an tarlang a ni.

Undivided Zemabawk Joint NGO hnena a intiam anga tun thlenga Ṭhuampui-Tuirial kawng siamṭha tura a taka hmalakna mumal a la awm lo chu hriatthiam harsa an tih thu sawiin MPCY chuan, "Sorkar inthlahdahna vanga mipui lungawi lo thawi damna hmanrua atana thu tiam ringawt a, a taka bawhzuina ngaihthah leh si hian Congress sorkarin ram leh mipui a ngaih pawimawh lohzia a tihlanna chiang takah kan ngai," an ti.