KHAWTHLIR

Special camp
Election Commission of India thu anga kum 18 tling tawh, electoral roll-a la awm lote thunna tura beihpui thlakna, Special Drive, July thla chhunga neih mekah Inrinni khan Thenzawl khaw chhunga polling station hrang hrangah Special Camp buatsaih a ni. Camp-ah hian booth level officer-te ṭhuin, electoral roll-a thun thar tur leh siamṭhat ngai eng emaw zat an inlan a ni.

Mission Sunday
Nimin Pathianni kha Isua Krista Kohhran (IKK) Mission Sunday a ni a, Mizoram hmun hrang hranga IKK-te'n an hmang. He ni pual hian chawhma, chawhnu leh zan inkhawmah hun an hmang a, mission rawngbawl lam hawi inzirtirna hun an hmang a ni.

Heroin man
Champhaia Excise & Narcotics department-te chuan July 8, Inrinni chawhma dar 11:15 khan Champhai Zotlangah heroin gram 28.5 (hawng 2) leh a neitua puh Lalmuanpuii (22) d/o Lalthanga, Champhai Bethel Veng nia insawi an man. Lalmuanpuii hi NDPS Act, 1985 tlawhchhanin thubuai siamsak a ni.

Thisen pe
Inrinni khan Leitan Bial KṬP-in Synod Hospital tan thisen unit 47 an pe a, a petute mipa 41 leh hmeichhia paruk an ni. Bharat Vikas Parishad, Vety College-in Aizawl Civil Hospital tan thisen unit 15 an pe bawk.

MHIP-in dem
MHIP general headquarters chuan thuchhuah siamin, Vanlalnuna, Myanmar lam mi, Maubawka khawsa mekin a nupui Cheuzakimi nunna a laksak chu pawi an tih thu an tarlang a; Vanlalnuna chu dan anga a na thei ang bera hrem ngei ni se an duh thu an sawi.

Beihpui thlak
Mizoram Presbyterian Kohhran chuan nizan khan Zarkawt Kohhran biak-inah Synod Revival ram pum huap beihpui thlak tur hawnna inkhawm an hmang. Inkhawm hi Synod senior executive secretary Rev. Lalramliana Pachuau-in a kaihruai a; moderator Rev. Lalzuithanga'n thuchah a sawi a ni.

Current-in man
Rohlupuia (44) h/o Vanlalpeki, Maubawk chu Inrinni khan Zarkawt Venga thing a thlaknaah electric line lian a sât palh a, electric current-in manin, ká chhawn lohin a thi.