Independence Day lawm a ni ; SEDP atan vbc. 328.13 kan ruahman - CM

Nimin khan ram pumah Independence Day vawi 76-na lawm a ni a, Mizorama a lawmna pui ber, Lammualah chuan khuallian chief minister Zoramthanga'n hnam puanzar a pawt pharh. Chief Minister chuan thu sawiin, SEDP kalpuina atan cheng vbc. 328.13 ruahman a nih thu leh chhungkaw 60,000 hnenah ṭanpuina Rs 50,000 ṭheuh pek a nih dawn thu a sawi.

Chief Minister chuan Mizoram mipuite Independence Day vawi 76-na chibai a bûk a; India ram zalenna champha vawi 75-na kawng hrang hrangin lawm a ni tih sawiin, "He ‘Year of the Amrit Festival of Independence’ hi ram tana kan zavai rilru min tiharh thartu ni se tih hi ka duhthusam a ni," a ti.

Zoramthanga chuan, India ram hruaitu hmasa, mi ropui tak takte'n India ram zalenna atana an inhlanna chu ram mipui ṭhangthar fuih chak thartua hman a pawimawh hle tih sawiin, ram zalenna tur leh ram ropui din tura an beihnate thlirin, entawn tlak an nihzia hre reng turin mipui a chah.

Hun inher danglam zelin hriat lâwk loh harsatna chi hrang hrang a her chhuahpui ṭhin tih sawiin Zoramthanga chuan, "Covid-19 kha harsatna pakhat chu a ni. Hun khirh leh harsatna karah pawh kan ramin hmasawnna kawng dik a zawh zel theih nan thâ thlah loa theihtawp kan chhuah chhunzawm reng a ngai a, kan ram tan hma lam hun êng zawk thlirin, nghet tak leh huai taka harsatna hmachhawn zel thei tura kan inrin a pawimawh," a ti.

CM Zoramthanga chuan, Mizoram chu ram nuam leh rálmuang, ram chhuanawma siam turin inlungruala theihtawp chhuah turin Mizoram mipui a ngen a; remna leh muanna vawng him a, harsatna awm apiangte inlungruala hmachhawn a, hneh zel tura rilru siam thar chunga Mizoram tan theihtawp chhuah zel turin mipui a sáwm a ni.

Chief Minister hian sorkar flagship programme SEDP chungchang sawiin, "He ruahmanna ang hian MLA constituency tinah beneficiary 1,500 awmin, beneficiary chhungkua 60,000 an ni dawn a, beneficiary-te chu an eizawnna duh thlanah bul ṭanna tur Rs 50,000 pek an ni dawn. He programme kalpui nan hian a vaiin sum vbc. 328.13 ruahman a ni," a ti.

Commonwealth Games 2022 neih zawh tâkah Jeremy Lalrinnunga'n weightlifting-ah India ram tan gold medal a lâk thu leh a lawmpui thu sawiin, hockey-a bronze medal latu Lalremsiami pawh chhuanawm a tih thu a sawi a, "Chawimawina a theih ang anga pek tum a ni," tiin, India tana medal latu Mizo pahnihte chu Mizoram tihmingṭhatu an nih thu a sawi.

Chief Minister hian I-Day lawmnaah hian Mizoram sorkar department hrang hrangin hmasawnna hna an thawh tawh te, thawh mekte leh hmachhawp chi hrang hrang a sawi lang.

Lengpui Airport terminal building chei ṭhat mekah hna thawh tur zinga 78% thawh zawh tawh a nih thu sawiin Zoramthanga chuan, "Airport-a kawng chhâwng sak mek chu hna 43% thawh zawh tawh a ni," a ti.

Aizawla Independence Day lawmnaah hian parade contingent 28 an awm a, armed contingent pasarih, unarmed contingent pali, school contingent 14 leh band party pathum an ni.

Parade-ah hian school contingent-ah St. Paul's HSS pakhatna an ni a, Synod HSS pahnihna niin, Mizo HSS chu pathumna an ni. Unarmed contingent-ah pakhatna 1st MAP Scout & Guide, pahnihna 20 Mizo Battalion NCC leh pathumna 1st Mizo Air Squadron NCC an ni a; armed contingent-ah pakhatna 2nd IR Battalion, pahnihna 3rd MAP leh pathumna 5th IR Battalion an ni.

CM Zoramthanga'n Independence Day parade-a ti ṭhate hnenah lawmman a sem a; Police, Excise & Narcotics leh Fire & Emergency Services-a thawk ṭha thlante hnenah chawimawina a hlân bawk.