Siamṭhatna kan thawh leh a ngai - Congress President

Congress party chuan nimin khan Aizawla Congress Bhavan-ah India ram zalenna champha vawi 75-na an lawm a, MPCC president Lalsawta'n Congress Bhavan kawtah hnam puanzar a pawt pharh. Lalsawta chuan, Congress-in siamṭhatna an thawh leh a ngai niin a sawi.

Hnam puanzar pawh pharh zawha inkhawmah Lalsawta chuan, nasa taka beih a nih hnuah August 15, 1947-ah zalenna neih a nih thu sawiin, "Hnam leh sakhaw hrang hrang zuitu mi vaibelchhe tam tak rorelna pakhat hnuaia kan awm thei hi a ropui tak zet. Communist lalpa, Russia premier Khrushchev, Pathian awm ring lo pawhin ropui a ti lutuk a, 'India rama ka zin aṭangin Pathian awm ka ring ta,' a tih phah hial a ni," a ti.

MPCC President chuan, ram hruaitute pawimawhzia sawiin, Mizoramah Congress party an sorkar leh ngei ngei a ngai niin a sawi a, "Kum 20 chhung ram buai avangin mi state hnungah kan kal ve chungin tunah chuan state dang kan tluk chho ve ṭan ta," a ti a, Mizorama hmasawnna tam zawk chu Congress tih a nih thu a sawi.

Duhthusam leh sawisel bo an ni lo chungin, Congress-in siamṭhatna an thawh leh a ngai nia sawiin Lalsawta chuan, "MNF-in Mizoram an sawp chhiat nasatzia kan hria, hemi sawi nan hian minute khat pawh ka ui tawh," a ti a; ZPM chu mi tam takin an ring lo nia sawiin, "Rim tak leh hah takin Pathian malsawm tlaka thawkin, tum thuhmun nghet tak nen a chhe lai siamṭha tura tih tak zeta kan thawh chuan he ram hi kan siamtha thei a ni," a ti bawk.