BJP-in an pisaah I-Day an lâwm

BJP, Mizoram Pradesh chuan nimin zing khan an party pisaah India ramin zalenna a hmuh champha vawi 75-na pualin hun an hmang. BJP president Vanlalhmuaka chuan, hlemhlêtna hnungkhirh a, retheihna leh harsatna lak ata zalenna Mizoramin a mamawh tawh thu a sawi.

Vanlalhmuaka chuan, Mizoramin harsatna leh retheihna lak ata zalenna a hmuh theih nan Modi kaihhruai BJP party chu kum 2023-ah thlan tlin a ngai tawh niin a sawi a, "Mizoram hmabak hi Mizote kutah a awm avangin a chhiat kan phal lo a, corruption hnungkhirh a, retheihna leh harsatna lak ata zalenna kan ramin kan mamawh tawh a ni," a ti.

BJP President chuan, "Mizote hian kan ṭhatna tur pawh hi kan hmu thiam lo fo. India rama kan awm hian zalên takin hun kan hmang thei a, sakhua avangin emaw, chi leh chi avangin emaw harsatna lian tham kan tâwk ta ngai miah lote hi a lawmawm hle a ni," a ti a; India rama Mizoram a awm chu vanneihthlak a tih thu a sawi.

BJP inkhawmah hian sàwm a nih angin PC Lawmkunga, IAS (Retd) pawhin thu a sawi a, "India flag hi a hlauhawm lo a, sakhuana nen a inkaihhnawih lo. Kan ram ṭhanmawhbáwk leh kan ram tana hlauhawm zawk chu sum ngainatna nasa lutuk te, corruption nasa lutukte hi a ni zawk," a ti.