Mizoramah Independence Day lawm a ni

Nimin kha Independence Day vawi 76-na a ni a, ram pumah lawm niin, Mizoramah pawh district khawpui tin bakah, khaw dang leh hmun dangahte lawm a ni bawk.

LUNGLEI
Independence Day hi Lungleiah chuan Ṭhuamluaia Mualah lawm a ni a, Assembly speaker Lalrinliana Sailo-in hmanpuiin, hnam puanzar a pawt pharh a, parade contingent 26-te'n hnam puanzar chibai an bûkna a chháng lêt.

Lalrinliana Sailo hian parade-a ti ṭhate leh I-Day puala infiamnaa intihsiakna hrang hranga ti ṭhate hnenah lawmman a hlân a; India zalenna sualtu Darthâwma (L), Lunglei Chanmari chhungte hnenah chawimawina thuchei a hlân bawk.

Speaker chuan, Lunglei District High Powered Committee sum nuai 500 hmangin kum 2021-22 chhungin Lunglei district-ah department 13 hnuaiah hmasawnna hna 38 thawh a nih thu te, kum 2021-22 chhungin Lunglei district-a police station-ah thubuai 128 ziah luh a nih thu te, MGNREGS hnuaiah job card nei mi 32,972-te tan inhlawhna ni 96 siam a nih thute a sawi.

Lungleia I-Day lawmnaah hian parade-ah armed contingent pathum, unarmed contingent pasarih, school contingent 14 leh band party pahnih an tel a; unarmed contingent-ah Lunglei College NCC pakhatna niin, school contingent-ah JNV, Pukpui chu pakhatna an ni.

SIAHA
Siahaah chuan khuallian, minister of state Dr K Beichhua hoin lawm a ni a, hnam puanzar chibai bûktu parade contingent-te chibai bukna a chháng lêt a, lawmman leh chawimawina chi hrang hrang a hlân bawk.

I-Day parade-a telte chu uniform contingent pathum leh school contingent 12 an ni a, an vaiin contingent 15 an ni. Uniform contingent-ah Mizoram Home Guard pakhatna an ni a, school contingent-ah Foxall HSS chu pakhatna an ni.

AH&Vety minister K Beichhua chuan, African Swine Fever léng vanga suat ngaite zangnadawmna atan ASCAD hnuaiah cheng nuai 584.97 hmuh a nih thu sawiin, "Mi 2,488 hnenah zangnadawmna pek a ni dawn a, a vaiin cheng nuai 1,169.94 pek tur a ni," a ti.

CHAMPHAI
Champhaiah chuan Chhangphut Field-ah I-Day lawm a ni a, minister of state Lalchhandama Ralte-in hnam puanzar a pawt pharh a, hnam puanzar chibai bûktu parade contingent 18-te chibai bûkna a chháng lêt.

Lalchhandama Ralte chuan, Myanmar ram buai vanga ráltlân naupang 2,064-te sorkar leh mimal sikul hrang hrangah kaltir an nih thu sawiin, "A remchan dan angin zirlaibu leh an mamawhte ngaihtuahsak ṭhin an ni a, zirlaibu leh uniform-te chu sorkar primary school leh middle school zawng zawngah pek a ni," a ti a; Mizoram State Teachers' Award dawngtu F Lalramliana, Zawlsei M/S headmaster chu mi dangte'n entawn se a duh thu a sawi.

Champhaia I-Day lawmnaa parade contingent 18-te chu armed contingent pakhat, unarmed contingent pasarih leh school contingent 10 an ni a; school contingent-ah pakhatna Bethel Mission School, pahnihna Champhai H/S leh pathumna GM HSS-te an ni.

KOLASIB
Kolasib Stadium-ah pawh I-Day vawi 76-na lawm a ni a, minister R Lalzirliana'n hnam puanzar pawt pharhin, parade contingent 17-te'n hnam puanzar chibai an bûk a chháng lêt.

R Lalzirliana chuan, Kolasib district chu Mizoram luhkapui a nih angin, ramri vên kawngah leh inkalpawhna kawng chungchangah ngaih pawimawh a ṭul zual bik thu a sawi a; oil palm rah metric ton 890 thar a nih thu leh sangha dil thar 150 siam tura ruahman mek a nih thu a sawi bawk.

Kolasib-a I-Day lawmnaah hian R Lalzirliana'n I-Day Badminton Tournament-a lawmman leh parade contingent ti ṭha lawmman a sem a; parade-ah hian unarmed contingent-ah St. Johns’ HSS NCC Girls pakhatna niin, school contingent-a Rengtekawn High School pakhatna a ni.

SERCHHIP
Serchhipah chuan I-Day vawi 76-na hi Serchhip Sports Complex-ah lawm a ni a, minister of state Lalruatkima'n hnam puanzar pawt pharhin, parade contingent 12-te'n hnam puanzar chibai an bûk a chháng lêt. Parade-ah hian pakhatna chu Goodwill English Academy an ni a, Marian H/S leh Presbyterian English School-te'n an dawt.

Lalruatkima chuan, Mizoram police-in thubuai an khawih 1,633 zinga 676 chu hlawhtling takin an chhui zo tih sawiin, "Silai tawlh rûk tum mi 20 manin, thubuai 12 an ziak lut. Serchhip district bikah kum kal ta chhung khan thubuai 136 ziah luh a ni a, 102 chu chargesheet niin, mi 14 convict tawh a ni," a ti a; Supreme Court thupek bawhzuiin police station leh outpost zawng zawngah CCTV leh audio recorder vuah mek a nih thu a sawi bawk.

Serchhipa I-Day ah hian Serchhip College Phunchawng Cultural Club-in hnam làm chi hrang hrang an entir a, zing karah I-Day pualin Serchhip khawpuia home-te, District Hospital leh District Jail-ah te thilpek sem a ni.

LAWNGTLAI
Lawngtlaiah chuan Central YLA Playground-ah I-Day lawm a ni a, minister of state Robert Romawia Royte-in hnam puanzar a pawt pharh a, hnam puanzar chibai bûktu parade contingent 20-te chibai bûk a chháng lêt a, lawmman leh chawimawina chi hrang hrang a sem.

Robert Romawia chuan, Lawngtlai District Administration leh LADC-te'n thawhhona ṭha tak an neih thu a sawi a; LADC hnuaia thawh Vawmbuka Community Centre leh Lawngtlai dáia Skill Development & Training Centre te chu 95% thawh zawh a nih tawh thu leh Lawngtlai Vengpuia Tribal Girls Hostel sak pawh 85% zawh a nih tawh thu a sawi bawk.

I-Day lawmna pualin Lawngtlai District Independence Day Celebration Committee chuan District Hospital, Christian Hospital, Lairam Christian Medical Centre & Hospital, Lairam Motherless Home, District Jail, Lairam Rescue Centre leh Gilead Drop-In Centre-ahte ṭanpuina Rs 2,000 ṭheuh an hlan a ni.

MAMIT
Mamitah chuan GSA Playground-ah I-Day vawi 76-na lawm a ni a, minister of state TJ Lalnuntluanga'n hnam puanzar a pawt pharh a, parade contingent 16-te'n hnam puanzar chibai an bûk a chháng lêt. Mamit District Hospital, Joshua Children's Home, Buannel Children's Home leh District Jail-te a tlawh a, thilpek a hlân.

Parade-ah hian school contingent 14, armed contingent pakhat leh 20th Mizoram Bn NCC, Mamit College-te an tel a; school contingent-ah Presbyterian English School girls contingent chu pakhatna niin, Mamit HSS girls contingent leh Mamit M/S-III te pahnihna leh pathumna an ni.

TJ Lalnuntluanga chuan, kum 2021 chhungin Mamit district-ah inner line permit (ILP) temporary 1,860 leh regular 169 pek chhuah a nih thu leh, temporary aṭangin Rs 1,86,000 leh regular ILP aṭangin Rs 3,44,410, a vaiin Rs 5,30,410 hmuh a nih thu a sawi.

SAITUAL
Independence Day hi Saitualah chuan Keifang Centenary Sports Complex-ah lawm a ni a, minister Lalchamliana'n hnam puanzar a pawt pharh a, hnam puanzar chibai bûktu parade contingent-te a chháng lêt.

Taxation minister Lalchamliana chuan, financial year 2021-22 chhung khan Taxation-in chhiah an hmuh tum cheng vbc. 717.03 chu vbc. 177.71-a khum a nih thu sawiin, "Kumin June thleng hian chhiah hrang hrang cheng vbc. 328.29 kan la khawm leh tawh," a ti a; Saitual district-ah hian GST registered dealer 24 an awm thu a sawi.

Saituala I-Day lawmnaah hian school parade contingent 19, MRHGCD Brass Band leh 2 IR Battalion-te an tel a; school contingent zingah Rûlchâwm High School chu pakhatna an ni a, PES Keifang leh Keifang HSS-te'n an dawt. Khuallian hian parade-a ti ṭhate lawmman leh zirtirtu thawk ṭhate hnenah chawimawina a hlan a ni. I-Day lawmna zawhah Lalchamliana chuan Saitual DC Office, Saitual SP office leh District Jail-te a tlawh bawk.

KHAWZAWL
Khawzawlah chuan Mualvawm Field-ah I-Day vawi 76-na lawm a ni a; deputy chief minister leh bialtu MLA Tawnluia'n hnam puanzar pawt pharhin, parade contingent 14-in hnam puanzar chibai an bûk a chháng lêt.

Parade-ah hian 2nd IR batallion bakah, unarmed contingent pathum leh school contingent 10 an tel a; pakhatna Grace Foundation School, pahnihna Khawzawl HSS girls contingent leh pathumna Khawzawl HSS boys’ contingent-te an ni. Parade-a ti ṭhate hnenah Deputy CM-in lawmman a hlân a, zirnaa Khawzawl district tihmingṭhatu mi pathum hnenah chawimawina a hlân bawk.

Tawnluia chuan, Khawzawl district chuan August 12, 2022 khan district a nihna kum thum a tling tih sawiin, "Hetih chhung hian Khawzawl district hian naupang têin kawng hrang hrangin hma a sawn a ni," a ti a; Khawzawl ICDS-in naupang kum ruk hnuai lam 3,511, nu nau pai 317, nu nau pawm 370 an enkawl mek thu leh elementary school 77-ah PM Poshan (midday meal) naupang 3,663 pek a nih thu a sawi.

HNAHTHIAL
Hnahthialah chuan HBSC Ground No. 1-ah I-Day lawm a ni a, minister of state K Lalrinliana'n hnam puanzar pawt pharhin, parade contingent 10-te'n hnam puanzar chibai an bûk a chháng lêt.

Minister hian Essay Writing Competition, Fire Prevention Award, zirlai ti ṭha chawimawina, faina leh thianghlimna lama chhuanawmte leh parade-a school contingent ti ṭhate hnenah lawmman leh chawimawina a hlân a ni.

Supply minister K Lalrinliana chuan, FCSCA department-in mi 11,23,340 hnenah ration buhfai a pek ṭhin thu sawiin, "Hnahthial SDC huam chhungah ration card-a chuang mi 14,803 awmin, NFSA-ah 9504, AAY-ah 930 leh PHH-ah 8,574 an awm," a ti a; "Supply kudam aṭanga buhfai la ṭhinte ei tur October 2022 thleng daih dah vek tawh a ni," a ti bawk.

Independence Day vawi 76-na hi khaw dang leh hmun dang ṭhenkhatah pawh lawm a ni a, MLA-te'n an hmanpui. Thingsaia F Hranghlira Memorial Ground-a I-Day lawmna chu Mizoram Youth Commission chairman Dr Vanlalṭanpuia, MLA-in a hmanpui a, parade contingent 15-in hnam puanzar chibai an bûk.

Gauhati High Court, Aizawl Bench chuan Court tualah an hmang a, judge Justice Michael Zothankhuma'n hnam puanzar a pawt parh a, 225 Battalion CRPF-in hnam puanzar chibai an bûk a ni.

Aizawl Theological College-ah pawh Centenary Building-ah I-Day lawm a ni a, adviser to CM K Lalsawmvela'n hmanpuiin, hnam puanzar a pawt pharh.