Mizoram COVID-19 : Dinhmun ; August-ah hripui vei mi 2,429 hmu tawh

August 14, Pathianni khan Mizoramah Covid-19 vei mi 50 hmuh chhuah a ni a, August thla chhungin mi 2,429 hmuh chhuah a ni tawh. Nimin khan hripui vei dam tawh mi 226 chhuahtir an ni a, Covid-19 vanga thi an awm lo.

Pathiannia Covid-19 positive hmuh thar mi 50-te chu mipa 18 leh hmeichhia 32 an ni a; TrueNAT hmanga hmuh chhuah mi pakhat leh rapid antigen test hmanga hmuh mi 49 niin, swab sample endik 151 aṭanga positivity rate chu 33.11% a tling.

Nimin khan hripui vei dam tawh mi 226 chhuahtir an ni a; district tina chhuahtir zat chu - Aizawl district-ah mi 75, Siahaah mi 36, Lunglei leh Champhai mi 28 ve ve, Serchhipah mi 19, Lawngtlai leh Mamitah mi 13 ve ve, Kolasib leh Hnahthialah mi panga ve ve leh Saitual district-ah mi pali an ni.

Kumin August thla chhungin Covid-19 positive mi 2,429 hmuh chhuah a ni tawh a, hripui vangin mi pasarih an thi tawh thung.

IDSP record angin, Mizoramah Covid-19 vei 2,35,229 hmuh chhuah a ni tawh a, mipa 1,09,503 leh hmeichhia 1,25,726 an ni a, mipa aiin hmeichhia 16,223-in an tam zawk. Nimin tlai dar 5 thleng khan mi 2,33,869 (99.42%) chhuahtir an ni tawh a, mi 717 (0.30%) thi tawhin, enkawl mek mi 643 (0.28%) an awm.

Hripui vei enkawl lai an tlahniam hret hret a, nimin tlai khan mi 643 an awm mek. Enkawl lai mi 100 awm tlinna Aizawl leh Lunglei district chiah a awm tawh a, Hnahthial district-ah chuan mi panga chiah an awm mek a ni.

Kum 2011 chhiarpui angin, Covid-19 vei hmuh tawh 2,35,229 chu state mipui zat aṭangin 21.43% a tling a; mi 1,000 zelah positive 214 an awm tawh ang a ni a, hripui vangin mi 1,00,000 zelah mi 65 an thi tawh ang a ni.