Pute mawng hlîmah Congress party puh

MNF party chuan thuchhuah siamin, Congress party-in an thuchhuahah 'Tunlai kawng chhia hi MNF sorkar inthlahdah vang a ni' an ti chu Congress party-a an pu ber mawng sáng taka hlîmna a nih thu an tarlang.

August 13, 2022-a Congress party thuchhuah chu anmahni pawhin an âwih loh, dâwt a nih an chian em em a nia sawiin MNF chuan, "MPCC thuchhuah hian an sorkar kum thum chhung ruahtui tam avangin kawngpui siamna hun a awm mumal lo, an ti a, khatih laia thil awmzia hria a, hmu ve rengtu mipui min bum an tum ṭãlh ngam hi a Congress ziain an inhmeh hle," an ti.

MNF chuan, Congress party chu tih-âtin an awm a, dâwt awihawm deuh phuah tur an hre tawh lo nia sawiin "Congress sorkar lai khan Mizoram dung tluan leh khaw chhung kawng zawng zawng a chhe em em vek a, khua leh pawl hrang hrangin hnatlangin kawng an siam sup sup a ni," an ti a; Congress sorkarin kut kuangkuahin kawng siama hnatlang mipui an thlir vel mai mai niin an sawi.

Chief minister Zoramthanga kaihhruai sorkar a pian tirh aṭangin CM-in kawng a ngaih pawimawh êm avangin PWD a chang nghal nia sawiin MNF chuan, "Sum tam tak séngin kawng siam hna thawh nghal char char a ni a, khaw kar kawng mai ni loin, Aizawl leh khaw hrang hrang khaw chhung kawng pawh a ṭha ta hle a ni," an ti.

MNF chuan, "Hmun ṭhenkhatah kawng zauh hna nasa taka thawh a nih avangin hmun ṭhenkhatah kawng a chhe rih lo thei lo. Tun hnai ruahsûr nasa avanga kawng khuar thar a awm leh ta leh leiminin kawng a tihchhiat a awm nual thu erawh phat thu a awm lo," an ti a; MNF sorkar laia kawng dinhmun chu Congress sorkar lai nen lei leh van anga danglam niin an tarlang a ni.