PUC lawmthu sawina leh lawmna

Pachhunga University College (PUC) chuan tun hnaia kawng hrang hranga hlawhtlinna an hmuh avanga lawmthu sawina, 'Thanksgiving and Grand Celebration 2022' nimin khan an auditorium-ah an buatsaih a, chief minister Zoramthanga'n a hmanpui.

CM Zoramthanga chuan, PUC-in tun hnaia zirna leh thil danga hma hruaitu a ni leh hlawhtlinna a chang chu chhuanawm a tih thu sawiin, "Engtikah emaw chuan PUC hi college mai ni loin university-ah a la inthlâk ka ring a, Mizorama university pakhat chauh awm hi a tâwk lo a ni," a ti a; zirtirtute leh zirlaite'n hlawhtlinna an chan theihna tura theihtawp an chhuahnaah a lawmthu a sawi.

Ruihhlo laka fihlim a pawimawh thu sawiin Zoramthanga chuan, "Tunlai hian Mizoramin hmelma lian tak a nei a, chu chu ruihhlo, cancer leh a kaihhnawih natna hrang hrang a ni," a ti a; ruihhlo leh a kaihhnawih hrang hrang natna tuartu tam zawk chu ṭhalai an nih thu sawiin, ruihhloa fihlîm turin zirlaite a chah.

Lawmthu sawina inkhawmah hian Mizoram University vice chancellor Prof. KRS Sambasiva Rao chu khualzahawm niin, thu a sawi a; PUC principal Prof. H Lalthanzara leh PUC Alumni Association president Lalbiakthanga Khiangte ten thu an sawi bawk.

PUC-IN HLAWHTLINNA A HMUHTE
1) July 26, 2022 khan NAAC-in A+ grade a pe.
2) NAAC endiknaah CGPA 3.37 an hmu a, hmarchhak college zinga NAAC grading-a sang ber a ni.
3) Ministry of Education hnuaia India rama zirna sang dinhmun endiktu National Institutional Ranking Framework (NIRF)-in ranking a tihchhuah thar berah India rama college zingah 45-na a ni.
4) NIRF tehnaa college ṭha zual 100 zingah PUC hi hmarchhak state aṭanga tel awm chhun a ni.
5) India Today-in kum 2022 chhunga India ram college ṭha zual, 'The Best Colleges in India' a thlan zingah PUC hi Arts-ah 141-na, Science-ah 167-na leh Commerce-ah 183-na a ni.
6) Ramngaw neih ṭhat leh humhalhnaa a thawh ṭhat avangin Green Mentors, Ahmedabad-in kum 2021-23 atan Platinum Rank a pe.
7) Aizawl district-a ramngaw humhalh ṭha, vawng thianghlim leh bawlhhlawh sawngbawl ṭha chawimawina District Green Champion 2021-22 chu Ministry of Education-in March 22, 2022 khan a hlan.
8) PUC NSS unit-in kum riat (2015-2022) chhung zirna-in zinga a thlàwna thisen pe tam ber lawmman a dawng tawh.
9) MZU hnuaia college-te inelna Varsity Sports-ah kum 2016-2022 chhung a záwnin overall champion an ni a, a záwna champion rei ber an ni mek.
10) Department of Information & Communication Technology-in zirna-in zinga website enkawl ṭha a thlanah pathumna leh online hmanga admission kalpui dan Best Online Service Initiatives-ah pangana a ni.