KHAWTHLIR

MLP Act-ah mi 2,425 man tawh
Mizoram Liqour (Prohibition) Act, 2019 hman a nih aṭangin Excise & Narcotics department-in MLP Act bawhchhia mi 2,425 man tawhin, thubuai 3,015 an ziak lut tawh a, ruihhlo tawlh ru mi 517 an man tawh bawk tih nimina Independence Day-a Chief Minister thusawi ziah sa (CM speech)-ah tarlan a ni.

Assam Rifle-in I Day hmanpui
Assam Rifles, Aizawl Battalion chuan nimin khan Mizorama an awmna hmun hrang hranga mipuite Independence Day vawi 76-na lawmna hun an hmanpui a, National Flag nen kawng an zawh a ni.

Complex tur atan Lungphùm phúm
Mampui khuaa Lawngtlai District Sports Complex sakna tur lungphùm chu nimin khan Sports minister Robert Romawia Royte-in a phúm. Sorkar thuchhuah tarlan danin, Lawngtlai District Sports Complex sakna atan hian Ministry of Minority Affairs hnuaia Pradhan Mantri Jan Vikas Karyakram aṭangin cheng nuai 5,019.43 pawmpuina hmuh a ni a, cheng nuai 4,517.49 (90%) chu sorkar laipui tum tur niin, nuai 501.94 (10%) chu state sorkar tum tur a ni. Central aṭangin first instalment nuai 2,258.74 dawn a ni tawh a, Decor India, Guwahati-in an sa dawn a ni.

Ráltlâna pawm turin PC-in ngen
PC party chuan thuchhuah siamin, "India ram zalenna kum 75-na a lo thlen hian Myanmar aṭanga Mizorama raltlân Zo hnahthlak unaute official refugee-a pawm turin prime minister Narendra Modi kaihhruai sorkar laipui kan ngen," an ti. Mizoram sorkarin sorkar laipui phalna a hmuh loh avanga Myanmar-a Zo hnahthlakte raltlan anga a la dawngsawng thei lo chu pawi an tih thu an tarlang a ni.

Lehkhachaih Kût
UDPA department chuan Pradhan Mantri Awas Yojana (Urban) pualin nimin tlai khan Mizo High School Field-ah Lehkhachaih Kûtpui (Kite Festival) an huaihawt a, UDPA secretary Lalmalsawma Pachuau-in a hawng. Festival-ah hian mi 100 vel an tel a ni. UDPA department hian PMAY hnuaiah hian August 5, 2022 aṭang khan intihsiakna chi hrang hrang an lo huaihawt tawh bawk.