Aizawlah lei laih khap mek a ni ; Khapna zâwm lo mi 8 hrem tawh

Aizawl Municipal Corporation (AMC) chuan fûr laiin lei laih vanga chhiatna a thlen loh nan kumin July aṭanga October thla chhung AMC huam chhungah lei laih leh leivûng hmanga ruam/kawr chhùn khah a khap. AMC hian khapna thupek bawhchhia mi pariat an hrem tawh.

Vanglaini palai zawhna chhangin AMC hotute chuan, lei laih khapna chu mipuiin an zâwm ṭha viaua an hriat thu an sawi a, "Chutihrualin, dan bawhchhia mi pariat kan hmu chhuak tawh a, dan angin Rs 5,000 ṭheuh kan chawitir a, lei laih phalna (permit) nei lote chu AMC-ah dil turin kan hriattir nghal bawk," an ti a; permit chu lei laih khapna thupek hlih a nih huna hman tur a nih thu an sawi.

Lei laih khap rih ni mah se, rîkrum thil leh hmanhmawhthlak bika hna thawh ngai, AMC-in phalna a pekte chu hriatthiamna pek an nih thu sawiin AMC hotute chuan, Aizawl New Market bazar sakna te, PWD hnathawh ṭhenkhat te, leimin leh leimin hlauhawmna hmuna lei laih ngaite chu AMC hriatpuinain ngaihhnathiam an nih thu an sawi bawk.

AMC hotute sawi danin, tun dinhmunah Aizawl hmun 958-ah lei laih phalna permit pek a ni a, dilna 19 hnâwl a ni thung. Permit pekna hmunahte hian lei laih khapna thupek kenkawh a nih chhung chuan lei laih phal a ni rih lo.

Khapna thupek bawhchhiate chu leivûng an paih zat cubic meter azirin pawisa chawitir theih a ni a; cubic meter 500 hnuai lamah Rs 5,000, cu.m. 500-1000 inkarah Rs 10,000 leh cu.m. 10,000 chung lamah chuan Rs 5 zelin a pung a ni.