Bru lak lêtna tura Mizoram sorkar Ruahmanna a ṭha tâwk - Home Ministry

Mizoram sorkara Home department hotute leh Ministry of Home Affairs (MHA)-a adviser (North East) MK Singla chu nimin khan Chief Secretary conference hall-ah an inkâwm a, Tripura refugee camp-a Mizoram Bru lak let chungchang an sawiho. MK Singla chuan, Bru lâk letna tura Mizoram sorkar ruahmanna chu a ṭhat tâwk thu a sawi.

MK Singla chuan, Tripura refugee camp-a Bru-te hruai kîr tura Mizoram sorkar ruahmanna chu ṭha a ti a, "Bru-te Mizorama an rawn haw leh theihna tura Mizoram sorkar hmalakna hian fak a phû a ni," a ti.

Meeting-ah hian Home department officer-te hi Home secretary Lalrinliana Fanai hoin an tel a; Bru hruai kîrna tura an hmalakna, thlen chin leh hmalakna chawlh lailâwk a nih chhante MHA Adviser hi an hrilhfiah. Bru lak let hna chu kumin thlasik chhunga thawh ṭan leh a besieawm thu tarlan a ni.

MK Singla chuan, Mizoram sorkar thu thlen hrang hrangte chu a ṭul anga bawhzui a tum thu a sawi bawk.

Zawhna chhangin, Home department hotute chuan, Bru la let turin Mizoram sorkar a inpeih reng tih an sawi a, "MHA lamin sum min pek a, refugee camp-a Bru-te an lo kîr duh chuan harsatna a awm lo, kan inbuatsaih vek tawh," an ti.

Home department aṭanga thu dawn danin, Tripura refugee camp pasa­riha Bru-te Mizorama hruai kîrna tur ruahmanna awm tawh, Supreme Court-in tihpuitlin rih lohna tur thupek a tihchhuah tawh chu sût leh tawh a ni.

Kumin kum tìr lam khan Mizoram Bru Displaced People Forum (MBDPF) bultumin Bru refugee camp-a awmte an awmna ngaia awm zuitir phûtin Supreme Court-ah an zualko a; Supreme Court chuan hemi chungchang hi ngaihtuah fel a nih hma chuan Bru hruai kîr tura ruahmanna chu bawhzui lo turin a ti a ni.

Supreme Court-a an thu thehluhnaah hian relief camp pasariha chhungkaw 6,688-a chhungkaw pa berin hming an ziak a, hruai kir an nih hmaa an thil phûtte tihhlawhtlin phawt an phût.

Supreme Court thuchhuak hi MBDPF ukilte chuan Delhi Mizoram House-a Resident Commissioner a hriattir a, Resident Commissioner hian Mizoram Chief Secretary leh Home Secretary a rawn thawn leh a ni.

Supreme Court thuchhuak vang hian Bru-te hruai kir tura ruahmanna lo awm tawhte chu bawhzui a ni lo a, mahse, Court-in MBDPF thu thehluh avangin Bru-te hruai kir hna chawlhsan kher ṭul a tih tâk loh avangin, hruai kir hna thawk tura hmalak chhunzawm a ni ta a ni.