Floor test-ah CADC CEM paih a ni

Chakma Autonomous District Coun­cil (CADC)-a chief executive mem­ber (CEM) Kali Kumar Tong­chongya chu nimin khan CADC session-a floor test neih a nih hnuah, CEM aṭangin a tla.

Hetih lai hian, MNF district headquarters, Chawngte chuan Governor-in CADC sorkar floor test a neihtir duh loh lantirna atan nimin khan CADC Session Hall bulah an pungkhawm.

CADC CEM hi MDC 20 zinga 12-in an rin tâwk lohna motion an put luh hnuah Governor chuan CADC sorkar hi July 4, 2017 khan a ṭhiat. Governor thupek vekin nimin khan CEM-in thlawptu a neih zat enin floor test neih a ni a, MDC 20 zinga 15-in CEM an thláwp lo a, pathumin an thlawp thung a, MDC pakhat a kal lo a, pakhat dangin session a kaihruai a ni.

Kali Kumar Tongchongya hi member zinga a tam zawkin an thlawp tâk loh avangin CEM aṭangin a tla a, CEM thar tur ruat a la ni lo.

MNF-te'n nimina lungawi lohna an lantirnaah hian Chakma district MNF president Rasik Mohan Chakma chuan, floor test neiha CADC Executive Committee thar din chu awmzia a awm lo tih sawiin, "Congress kaihhruai CADC sorkarin eirukna nasa taka an kalpui lehna tur mai mai a ni," a ti.

Mizoram sorkarin eirukna a zung nena pho ro a intiam tih sawiin RM Chakma chuan, Mizoram sorkar chu eirukna pho ro an duh tak tak a nih chuan Governor zalenna pe a, CADC sorkar hnuaia eiruknate chhui chiang tur commission dintir turin a phût a ni.