HDFC-in Aizawl Civil Hospital tan Mobile blood donation van an pe

HDFC Bank-in Aizawl Civil Hospital Blood Bank tana mobile blood donation bus an pek tur chu, nimin khan Health minister Lal Thanzara hnenah an hlan.

Van hlanna inkhawm hi Chief Minister's Office conference hall-ah neih a ni a; Health Minister chuan, hriselna kawnga thawk­tute an pawimawh rual­in, thisen petute an hlu tih a sawi a, "He van hi kawng ṭhat loh vanga thi­sen pek chungchanga buai­na tâwkte chhâwk zâng­khaitu a nih ngei ka beisei. Association for Volun­tary Blood Donation (AVBD) pawhin van hi an ṭangkaipui bakah thisen petu an tam phah ka ring a ni," a ti.

Mobile blood donation van atan hian TATA Star­bus hman niin, thisen lak theihna atan a chhung lam chu siam a ni.

Bus chhungah hian khum pahnih, chair sei pathum, thisen dahṭhatna tur refrigerator pahnih (a lian leh a tê), air conditioner khawl pahnih, LED TV pahnih, sound system leh silent generator-te dah a ni. Bus leina leh thisen pek/lak theihna atana siamna senso zawng zawng chu Rs. 28,05,653 a ni.

Tun dinhmunah Mo­del Blood Bank, Civil Hos­­pital, Aizawlah hian thawk­tu mi 34 an awm a, ni tin thisen unit 70-80 an pe chhuak ṭhin a ni.