Mizoram University UG result tharah College zingah HATIM an ti ṭha ber

Kumin June thla tawpa Mizoram University (MZU) Examination department-in a hnuaia under graduate (UG) result a tihchhuah takah, UG final year (6th. semester) bikah pass percentage aṭanga tehin, Higher and Technical Institute of Mizoram (HATIM), Lunglei-in an ti ṭha ber a, Pachhunga University College (PUC)-in an dawt.

UG final year-ah hian HATIM hian Arts leh Commerce-ah candidate an nei a, Arts-ah zirlai 22 leh Commerce-ah candidate 36 an nei. Arts-ah hian zirlai 22 zinga 19 (86.36%) an pass a, Commerce-ah candidate 36 zinga 31 (86.11%) an pass a; a pumpuiah an candidate 58 zinga 50 (86.21%) an pass a ni. HATIM hi Arts leh Commerce-ah pass percentage sang ber an ni ve ve.

PUC chu candidate ngah ber college an ni a; Arts, Science leh Commerce-ah candidate 984 neiin, chung zinga 672 chu an pass a, pass percentage chu 68.29% a ni. PUC hi Science zir theihna college paruk zingah pass percentage sânna ber niin, regular leh repeater candidate belhkhawmin candidate 355 zinga 209 (58.88%) an pass a; a dawttu, Lunglei College-in candidate 82 zingah pass 38 (46.34%) an nei a ni.

Arts 6th. semester bikah, PUC-ah pass percentage chu 72.13% niin, HATIM dawta sang ber a ni a; Zawlnuam College (69.23%), Khawzawl College (68.18%) leh Hrangbana College (64.28%)-te chu pass percentage sang dangte an ni.

Hetih lai hian, Lawngtlai College chu pass percentage hniamna ber niin, 30.19% chiah an pass a; Saiha College (32.45%) leh Mamit College (33.90%) ten an dawt.

Mizoramah B.Sc. zir theihna hi college paruk a awm a; chungte chu - PUC, Zirtiri Residential Science College, Serchhip College, Lunglei College, Champhai College leh Kolasib College-te a ni. Zirtiri Residential Science College hi B.Sc. (Home Science) zir theihna college awmchhun a ni bawk.