CM Hawla leh MHA Adviser an inkâwm

Ministry of Home Affairs-a adviser (North East) MK Singla chuan, nimin khan chief minister Lal Thanhawla chu a banglaah a kâwm a; Tripura refugee camp-a Mizoram Bru lak let chungchang a sawipui.

Chief Minister chuan, Mizoram aṭanga Bru an chhuah dan sawiin, "He thila intihmingchhiatna leh puhna hrang hrang sorkar leh tlawmngai pawlte'n an lo tâwk tawh a ni," a ti a; MK Singla chu Bru-te Mizoramah kîr duh lo zel ta se, Ministry of Home Affairs hmalak dan tur a zawt.

CM zawhna chhangin MHA Adviser chuan, a mimal ngaihdan chuan, Bru-te chu Mizorama an kîr duh lo zel a nih chuan refugee camp khâr a, ṭanpuina an hmuh ang ṭhinte pawh tihtawp ni se a duh thu a sawi.

MK Singla chuan, Bru-te'n tun hnaia thil an ngiat thar chu âwm lo a tih thu sawiin, "He thil hian tawp chin a neih a ngai a, hun ruahman a nih hnuah, hun tiam chhung ngeia repatriation zawh a nih theih nan ṭan lak a ni ang," a ti.

Bru zinga hruaitu ṭhenkhatte'n mipui an hruai sual tih sawiin MK Singla chuan, "An hmasialna vangin repatriation an tiṭhuanawp ṭhin a ni," a ti a; harsatna chinfel a nih theih nan ruahmanna siam mek a nih thu a sawi bawk.