Saikhawthlirah Middle School zirlaite chawlhtir

Saikhawthlir khuaa sorkar enkawl, Rosanga Memorial Middle School-a zirlai nu leh pate chuan sikulah zirtirtu an awm loh avangin nimin aṭangin khan tiamchin awm loin an fate sikul an chawlhtir.

Zirlai nu leh pate thuchhuakin a tarlan danin, Rosanga Memorial M/S-ah hian zirtirtu pa-nga an awm a, mahse, zirtirtute chu sikul an kal ṭha lo hle.

June 5, 2017-ah phei chuan zirtirtu sikul kai an awm loh avangin zirlaite an haw leh a; a hnuah pawh zirtirtu an awm mang loh avangin an indaih loh a, subject an zir kim thei lo a ni.

Zirlai nu leh pate chuan, zirtirtute'n sikul hun an ngai pawimawh lo nia sawiin, "Sikulah hian discipline mumal taka kenkawh a awm lo," an ti a; sorkarin sum tam tak sênga zirtirtu a rawihte chu ṭha taka zirlai naupangte zirtir turin an phût tih an sawi.

An thuchhuak chuan, Rosanga Memorial M/S-ah hun rei tak chhung headmaster an awm tawh lo a, tunah hian headmaster tura tih chu Mamit DEO pisaah awmtir (attach) mek a ni tih sawiin, Rosanga Memorial M/S-a a hna tur dik tak zawm vat turin an phût a ni.

Zirlai naupangte chawchhun tur buhfai a bo ṭhin a, naupangte'n chawchhun ei tur an nei lo fo nia sawiin, "Kan hrethiam thei lo. Khawtlang hruaitute'n sikul chungchanga kan harsatna thuneitute hnenah an thlen tawh chu tun thleng a awmzia a la nei lo. Hengte vang hian kan khaw sikul hi thuneitute'n min en-fiahsak a nih loh chuan, kan fate kalna tlakah kan ngai tawh lo a, tiamchin awm loin kan chawlhtir ta a ni," an ti.