CM hoin ramri ven zel dan sawiho

Chief minister Zoramthanga kaihhruaiin nimin khan Home department, Assam Rifles leh Border Security Force (BSF) hotute CMO Cabinet meeting room-ah an ṭhukhawm a, Covid-19 léng mek laka invenna atana Mizoram vèn hna kalpui mek dan leh hmalak zui zel dan tur an sawiho.

CM Zoramthanga chuan, "Hripui léng kan buaipui mek hi engtin nge a awm zel dawn kan hre lo a, uluk takin ramri kan vèn chhunzawm zel a pawimawh a ni," a ti a; BSF leh Assam Rifles sipaite chu ngawrh taka ramri veng zel turin a fuih.

Assam Rifles leh BSF hotute chuan, task force-te'n ramri vennaa an pui chu lawmawm an tih thu an sawi a; chutih rualin, sipai nen duty dan a inan loh avangin force hrang hrangte inkarah leh tualchhung mite inkarah thawhhona ṭha awm thei tura ruahmanna siam ṭha an tih thu an sawi.

Meeting-ah hian, ramria duty dan kalphung uluk leh awmze nei zawka kalpui dan tur sawiho a ni a; fûrpui thleng turah indaihzai thei ang bera duty sem rual dan tur ruahmanna thar siam an rél. BSF, Assam Rifles, Mizoram police leh task force duty-te'n thawhhona ṭha zawk an neih theih nan ruahmanna siam ni se, an ti.

Meeting-a an sawi lan danin, Myanmar nena inrìna hmun 50 velah Assam Rifles company 22 an duty a, Bangladesh nena inrìna hmun 40 chuangah BSF-in sipai company 24 an dah thung.

International border pa­hnihah leh inter-state border-ahte Mizoram police leh task force-te an duty bawk a; task force aṭangin international border-ah mi 1,076 an awm mek a, inter-state border-te chu mi 508-in an veng mek bawk.

Mizoram police-te chu Covid-19 chungchanga ramri venhim hna thawk tur te, dan leh thupek kengkawh tur te, quarantine centre venhim hna leh contact tracing hnate thawk turin mi 2,906 an indah mek a ni.

Nimina ṭhutkhawmah hian Home minister Lalchamliana, chief secretary Lalnunmawia Chuaungo, DGP SBK Singh, Home secretary Lalbiaksangi, Assam Rifles 23 Sector DIG leh BSF DIG  Sector Headquarters, Mizoram hotute an tel.