Mi 21-te Covid-19 lakah fihlim

Zoram Medical Col­lege (ZMC) Covid-19 Testing Laboratory-a April 30, Ningania mi 21-te swab sample endikte'n Covid-19 an kai lo vek tih finfiah a ni. Nimin khan mi pakhat sample endik leh a ni a, he thu ziah lai hian result hriat hman a ni lo.

State Referral Hospital-ZMC Covid-19 Bulletin nimin tlaia chhuak chuan, State Referral Hospital ICU-a enkawl mek Covid-19 vei damlo chuan hma a sâwn zel tih a tarlang a, "Vawiin (Zirtawpni) khan CT Scan tih a ni a, Isolation ward-ah sawn lailâwk a ni a, naktuk (Inrinni)-ah ICU-ah sawn luh leh a ni ang," a ti.

State Referral Hospital hi Covid-19 designated hospital atana ruahman a nih hnuah nimin thleng khan Covid-19 kai rinhlelh damlo leh anmahni hruaitu mi 51 dah luh an ni tawh. Tun dinhmunah Make Shift ICU Ward-ah mi pakhat leh Holding Ward-ah mi pathum an awm mek a ni.

Sorkar thuchhuaha a lan danin, Ningani tlai dar 5 leh nimin tlai dar 5 inkarah Mizoram luhka hrang hrangah mi 630 enfiah (screen) an ni a, Rapid Anti Body Test of India (RATI)-a enfiah mi 90 an awm. Quarantine facility-a dah thar mi 171 leh home quarantine thar mi 89 an awm a, hmar­chhak state pali aṭanga rawn haw tharte an ni.