Chanchinbu semtute an lâwm

Mizoram Chan­chinbu Sem Association (MCSA) chuan thu­chhuah siamin, hun rei tak inkhàrkhip a nih tawh avanga an harsatna hrethiama Aizawla chanchinbu ṭhenkhatte'n an hlawh pangngai aia tam hlawh an pek thu an tarlang a, an lawm tak zet thu an sawi.

MCSA chuan, inkhârkhip vanga an chawlh chhungin an member-te'n harsatna hrang hrang - in luah manahte leh thil dang dangah an tawh ve thu sawiin, "Chutih laiin, kan pute - Vanglaini, The Aizawl Post leh The Zozam Times neitute'n kan harsatna hriain, kan hlawh tur dik tak aia tam March leh April thla chanchinbu man aṭanga hmun thuma ṭhena hmun hnih lai min chantir a, anmahni hek huama hlawh sang tak min siamsak hi kan lawm hle a, a ropui kan ti. Pathianin a lêt tam taka malsawmnaa a vûr turin duhsakna sang ber kan hlan a ni," an ti.

Covid-19 vanga inkhârkhip laiin hun eng emaw ti chhung chanchinbu an sem loh hnua chanchinbu an sem leh thei chu an lawm thu leh, chanchinbu an sem theihna atana hma latu sorkar leh veng hrang hranga task force-te chunga an lawm thu an sawi bawk.