Journalist Workshop buatsaih a ni ; IPR Minister-in chanchinbumite Mahni inthunun turin a chah

Information & Public Relations (IPR) department chuan nimin khan an directorate auditorium-ah 'Journalist Workshop' an buatsaih a, IPR minister Lal Thanzara khuallian a ni. Minister chuan, chanchinbumite chu páwn lam aṭanga inthununtir lo tur leh mahni inthunun turin a chah.

Workshop hi IPR director Lalni­thangi'n a kaihruai a; IPR Minister chuan, journalist-te chu pressure group an ni lo tih sawiin, pressure group-te chetnaah inhnamhnawih lo turin a chah a, "Páwn lam aṭangin min control tur a ni lo a, mahni in control tur a ni. Thil ṭha leh ṭha lo, dik leh dik lo thlan tur a awm," a ti.

Chanchinbu mite'n zalenna leh thil tih theihna nasa tak an nei tih sawiin Thanzara chuan, "Kan zalenna hi dan hnuaiah a ni a, danin min phuar tih hriat a ṭha. Kan thil tih theihna hi hman thiam a ngai... Zalenna kan neih avangin duh duh tih theih a ni lo a, duh duh ziah theih a ni lo," a ti a; mi dang zalenna zahsak ṭhin turin a chah.

Lal Thanzara chuan, tunlaiah internet leh social network a chak tawh a, chu'ng hmang chuan thil a darh zung zung tawh tih sawiin, "Kan hriatnate hi a hun leh hmun dik takah kan hman a ngai," a ti a; chanchinbu mite chu rinawm leh dik taka thawk turin a fuih a ni.

IPR Minister chuan, journalist-te'n ram leh hnam tan nasa takin an thawk tawh ṭhin tih sawiin, "Ram hmasawnnaah an thawh hlawk hle a ni," a ti a; journalist hna chu taimakna, rinawmna, dikna leh huaisenna tel lo chuan a duh leh châk nazawng tan thawh theih a nih loh avangin, journalist hna chu a pawimawh thu a sawi bawk.

Workshop hawnna inkhawmah hian IPR secretary Biaktluanga leh MJA president Vanlalrema Vantawl-te pawhin thu an sawi a; MJA President chuan, MJA chu pressure group a ni lo tih sawiin, chanchinbumite chu pressure group anga awm lo tur leh communal har­mony tibuai thei zawnga chetnaah inthiarfihlim turin a chah a ni.

Workshop-ah hian Rozama Chawngthu-in Mizo ṭawng chung­chang a sawi a, IIMC-a assistant professor Dr C Lalmuansangkimi'n 'Journalism' tih thupui sawiin, Mizoram University Mass Commu­nication department-a assistant professor Dr Irene Lalruatkim'n 'Social media' tih thupui a sawi.

Aizawl bakah, district hrang hranga journalist-te an tel a, thupuite hi an sawiho nghal a ni.