World Population Day hman a ni

Nimin khan Mizoram hmun hrang hrangah World Population Day hman a ni a, Aizawlah chuan Vanapa Hall kawtah Health minister Lal Thanzara hoin zing karah hman a ni. Kumina World Population Day thupui chu, 'Beiseina thar, hmasawnna thar, i chhungkaw hmasawnna chu i mawhphurhna a ni' tih a ni.

Lal Thanzara chuan, World Population Day-in a tum ber chu, nu leh nau hrisel zawkna atana beiseina leh hmasawnna thar neih a nih thu a sawi a, "He hmasawnna hi chhungkaw ruahmanna ṭha aṭanga thleng thei a ni," a ti.

Mizoramah kum 2016-17 chhungin nu, nau chunga thi 20 an awm a, nausen 300 chuang thi an awm thu sawiin Health Minister chuan, "Nu leh nau thihna tam zawk chu naupang lutuka fa neih te, chhang zing lutuka nau paite leh hriselna nghawng khawpa fa neih tam vangte a ni," a ti a; nu leh nau hriselna chu chhungkaw hmasawnna atan a pawimawh thu a sawi.

World Population Day pual hian zing karah rally buatsaih a ni a, mi ṭhahnem tak telin, Vanapa Hall aṭanga Zarkawt Recreation Centre thleng ke-in an kal.

Lungleiah chuan World Population Day hi RNTCP conference hall-ah hman a ni a, Lunglei chief medical officer Dr VLMS Dawngliana'n kaihruaiin, Lunglei BDO Dr Malsawmtluanga Fanchun chu khuallian a ni.

Serchhipah chuan CMO conference hall-ah hman a ni a; Serchhip CMO Dr Laldawngliana Sailo chuan, tun hma deuhin population control tih nasat a nih thu sawiin, "Mizote hi hnam tlemtê kan nih avangin fa neih tlem aiin fa neih tam inzirtirna hi kohhran leh khawtlangah chuan kan uar leh ta zawk a ni," a ti.

World Population Day hi kum tin July 11-ah hman niin, Mizoramah chuan kumin aṭangin thla khat chhunga hman tura ruahman a ni a; hun hman tur hi Mobilisation Fortnight (June 27-July 10) leh Population Stabilisation Fortnight (July 11-24)-a ṭhen a ni.