CS conference-ah Mizoram CS-in Mizoram hmalaknate a sawifiah

National Conference of Chief Secretaries chu Thawhṭanni khan New Delhi-ah prime minister Narendra Modi hoa neih a ni a; chief secretary Lalmalsawma'n 'Best Practice Through Public Participation in Mizoram' tih a sawifiah.

CS Lalmalsawma hian paper a present bakah, Honk Free Aizawl City - Testimonies from Visitors a sem a; Planning secretary Dr C Vanlalramsanga leh Agriculture secretary Lalhmingthanga ten an ṭawiawm a ni.

Sorkar thuchhuah tarlan danin, NITI Aayog-in state ranking development indicator hrang hrangah Mizoram chu a ti ṭha ber zingah a tel. State economy hmasawnna ṭhan chak dan tehnaah high growth states 8% aia ṭhanna sang zawk state pali zingah Mizoram a tel a; state dangte chu Gujarat, Jharkhand leh Tripura an ni.

Primary Education Outcome-ah leh nutrition (malnourished tlemna)-ah pawh Mizoram chu a ti ṭha ber a ni a; chutih laiin, ease of doing business leh fiscal management-ah erawh chuan hnufual ber zinga mi a ni thung.