MSHCS-ah bill diltu 5,770 an awm

Mizoram State Health Care Society (MSHCS) chu nimin khan chief minister Lal Thanhawla hoin CMO conference hall-ah an ṭhukhawm a; MSHCS hnuaiah hian nikum sorkar kum, 2016-17 chhung khan bill diltu mi 5,770 a awm thu an tarlang.

Meeting-ah hian MSHCS-a inziak lut an pung a, inenkawlna man a san avang-te leh bank-a sum punna (interest) rate a tlakhniam avangtein thla thum dana Corpus Fund tlingkhawm aṭanga cheng nuai 300, Finance department-in a pek ṭhin chu indaih loh a nih thu sawi a ni.

A tira ADB loan ‘Corpus Fund’ chu belhchhah a ṭul tawh an ti a, sum belh tur zatte leh Mizoram sorkarin a thawh tur zatte zir chian ni se, an ti.

Tun hnaia Council of Ministers ṭhukhawmin sorkar hnathawkte medical reimbursement zir chianna, Sub-Committee on Medical Reimbursement Report an pawm chu sawiho a ni. Report-ah sorkar hnathawkte MR bill pek tlak a nih hmain MSHCS-in medical bill-te endik rawt a ni a, chuta tana thawktu mamawh belh tur zat chhût chu MSHCS kutah an dah.

Meeting-a tarlan danin, April 1, 2016 leh March 31, 2017 inkar khan MSHCS-ah mi 1,15,221 an inziak lut a, inenkawlna senso diltu mi 5,770 awm-in, an sum dil zat belhkhawm chu Rs. 14,53,40,18 a ni. Bill claim zinga mi 833 (Rs. 2,44,85,211) chu la pek loh an ni.