Tlabunga NGO-te'n India ram map aṭanga Tlabung thaibo mai ṭha an ti

Tlabung khuaa V/C-te leh tlawmngai pawl hrang hrangte chuan, Mizoram sorkarin Tlabung leh a chhehvel chu an ngaihthah lutuk bik niin an ngai a; hei vang hian Mizoram sorkar laka beisei nei lo law law turin, India ram map aṭanga Tlabung thâibo a nih theih dan tur kawng zawn mai ṭha an ti.

Tlabunga V/C, YMA, MHIP, MUP leh Tlabung Progressive Society hruaitute July 10, Thawhṭannia ṭhukhawm chuan, Mizoram sorkarin Tlabung leh a chhehvel a ngaihthah vanga hmalak dan tur an ngaihtuah a; hmalak dan tur leh sorkar laka an phûtte siamin, chutah chuan pawl hrang hrang aiawhte'n hming an ziak a ni.

Tlabung NGO-te chuan, Mizorama damdawi-in hmasa ber, Tlabung damdawi-in, khum 30 awmnaah doctor pakhat chauh a awm avangin tun hnaia sorkarin doctor 26 a lak thar aṭangin doctor pakhat tal pek belh an inbeisei thu an sawi a; mahse, doctor pek belh a nih ve tak loh avangin, "Tlabung leh a chhehvel khaw hrang hrang mipuite'n ngaihthah kan hlawhzia lantirtuah kan ngai," an ti.

NGO-te tarlan danin, Tlabung damdawi-inah hian kum 2011 thlengin doctor panga an nei ṭhin a, doctor-te chu thlaktu awm loin sawn chhuah ṭhin an nih avangin kum 2012-ah chuan doctor pahnih chiah an awm tawh a; kum 2015 aṭangin doctor pakhat chiah an nei tawh a ni.

Tlabung damdawi-inah July 2017 ral hma ngeia doctor dah belh turin NGO-te chuan Mizoram sorkar an phût a; doctor dah belh a nih loh chuan doctor an neih belh ngei theih nan na zawka hmalâk an rêl. Hmalakna tura an rel zingah, kawngzawh te, Tlabunga sorkar pisa leh zirna-in kharte a tel.

Tlabung NGO-te chuan, "Tlabungin kawng hrang hranga ngaihthah kan hlawhzia kan ngaihtuahin, enkawltu sorkar nei ve ta lo ang maiah kan in-ngai a. Hetiang dinhmuna awm reng ai chuan, sorkar laka beisei nei lo law law turin India ram map aṭanga Tlabung thâibo a nih theih dan tur kawng zawn ni se, kan ti," an ti bawk.