MZU hnuaia college-te UG result bihchianna

Kumin June thla tawpa Mizoram University (MZU)-in a hnuaia under graduate (UG) result a tihchhuahah, UG final year (6th. semester) bikah pass percentage aṭanga tehin, Higher and Technical Institute of Mizoram (HATIM), Lunglei-in an tiṭha ber a, an candidate-te an pass vek a, pass vekna college awm chhun a ni.

July 11, 2017 Vanglaini-a UG result tarlanah, 6th. semester result anga tarlan chu 2nd. semester zawk a ni a; tihsual palh a ni a, chhiartute hriatthiamna kan ngen e.

UG final year-ah hian HATIM hian Arts leh Commerce-ah candidate an nei a; Arts-a an zirlai 28-te leh Commerce-a an zirlai 30-te an pass vek a; hetihlai hian gold medalist leh subject topper an awm lo thung.

Arts 6th. semester-ah hian exam mi 3,385 awmin, mi 2,132 an pass a, pass percentage chu 62.98% a ni. Candidate zat aṭanga pass percentage san zawngah HATIM hi Khawzawl College-in an dawt a, pass percentage chu 86.66 a ni a; JB College, Lunglei-in dawt lehin, 83.83% an pass a ni.

Arts-ah hian Saiha College-ah pass an tlem ber a, 31.09% an pass. Pass tlemna ber dawttu, Lawngtlai College-ah 33.03% an pass a; Lunglei College-ah 46.84% an pass bawk.

Arts-ah hian subject 12 a awm a; subject pakuaah Pachhunga University College (PUC)-in topper an nei a, Govt. Aizawl College, Hrangbana College leh Serchhip College-te'n topper pakhat ṭheuh an nei thung.

Mizoramah B.Sc. zir theihna college paruk a awm a, 6th. semester exam zirlai 508 awmin, mi 272 (53.54%) an pass. College paruk zingah Lunglei College-ah pass percentage ṭha berin, 64.28% a ni a, PUC-in an dawt (59.33%). Pass chhiatna ber chu Champhai College a ni a, 26.66% an pass a, a dawttu Kolasib College-ah 34.48% chiah an pass.

Science-ah hian subject pakua a awm a; chu'ngah chuan PUC-in topper paruk neiin, Lunglei College-in topper pahnih leh Zirtirti Residential Science College-in pakhat an nei.

B.Com. zirna college pali a awm a, HATIM aṭanga exam-te an pass vek. Hrangbana College aṭangin 85.71%, PUC aṭangin 77.77% leh GAC aṭangin 76.59% an pass bawk. Commerce-ah hian candidate 234 zinga 197 (84.18%) an pass a ni.

B.Sc. (Home Science) zirna college pakhat, Zirtiri Residential Science College a awm a; zirlai exam 28 zinga pakua an pass a, pass percentage chu 32.14% a ni.