ZPM MLA-te ramriah

ZPM MLA-te chu nimin khan insemdarhin ramri an tlawh. ZPM Legis­lature Party dy. chairman Vanlalhlana leh Aizawl West-III bialtu MLA VL Zaithan­zamate chuan Vairengte an tlawh a, Mizorama motor lo lut tur uluk zawka kah thianghlim nise an duh.

ZPM MLA pahnihte chuan Assam aṭanga motor lo lut tur kah thianghlim lai an enfiah a, uluk zawka kah a nih loh chuan a him tawk lo ang tih a hlauhthawnawm thu a hmuna mawhphurtute hnenah an thlen nghal.

Vanlalhlana leh VL Zaithanzamate hian Kolasib DC Dr H Lalthangliana pawh kawmin, ramri venhimna atana rawtna an neihte an sawipui nghal. Hemi hnu hian Buhchangphai leh Phaisena remri vengtute an tlawh leh a ni.

Vanlalhlana chuan ramri vengtute an tlawhnaah thu sawiin, "Kan him loh hlauin ruahpui karah buk sual chawpin ramhnuaiah in riak tih kan hria a, Ai­zawla tui taka lo mut hi kan inthiam seng bik lo a, lawmthu sawi nan a hmunah kan rawn chibai che u a ni," a ti. 

MLA pahnihte hian khaw hrang hranga task force-te leh duty-te hnenah pawisa leh invenna bungraw chi hrang hrang an hlan nghal a ni.

Aizawl South-I bialtu MLA C Lalsawi­vunga chuan khawchhak lam Ṭiau lui kama duty-na hmun tlawhkual­in, police lam an indaih loh avangin an hah hle a, tam zawk dah belh theih ni se ṭula a hriat thu a sawi. 

C Lalsawivunga hian khaw hrang hranga local task force leh duty-te chu thingpui in man tur, face mask, hand glove, sanitizer leh silpauline a pe.

Aizawl North II bialtu MLA Dr Vanlalthlana'n khawthlang lam ramri venga Langkaih lui dunga riaka duty ṭhinte buk hrang hrangte a tlawh a, New Eden riahbuka duty-te chuan MLA hmel an hmuh avanga an thlamuan thu an lo sawi. 

Dr Vanlalthlana hian ramri venga duty-te chu thingpui lumna tur pawisa leh Covid-19 laka invenna tur hmanraw hrang hrangte a hlan. Dr Vanlalthlana hian vawiin hian Bairabi lama venbuk hrang hrang a tlawh leh dawn.