MPCC-in PPE lei danah FIR an thehlut Opposition party tih tur ti-ah an inngai

Mizoram Pradesh Congress Committee (MPCC) Media department chuan, Mizoram sorkarin personal protective equipment (PPE) a lei dan chhui chian a nih theih nan nimin khan Anti Corruption Bureau (ACB)-ah first information report (FIR) an thehlut. MPCC chuan, an thil tih chu oppositon party tih tura an ngaih thu an sawi.

FIR-ah chuan, Covid-19 donaa Mizoram sorkar hmalak dan ṭhenkhatah thil fel lo, chhui fiah ngai a awma an hriat thu tarlangin MPCC chuan, "March 27, 2020 khan Mizoram sorkar chuan Air India cargo Airbus-319 hmangin PPE set 10,900 leh hmanraw dang an chah thleng a. Hemi ṭuma PPE set chah thlen zingah hian eng emaw zat chu hman tlâk loh a ni tih hriat a ni," an ti.

MPCC tarlan danin, Covid-19 Medical Operational Team chairman Dr ZR Thiamsanga'n April 4, 2020-a press statement a siamah, 'Hetianga hnawhsarum taka kan mamawhna a sân em avanga lak khawm a nih avangin a ṭha leh ṭha lo pawh thliar theih a ni lo. Heng zingah hian duhthusam tling lote pawh a tel nual' tiin a sawi a ni.

FIR thehluttu MPCC Media secretary C Lalhriatpuia chuan, FIR an thehluh chu politics-a inbeihna chauh a ni lo tih sawiin, "Hetiang hri léng kan buaipui karah hian mipui sum dik lo taka hman a awm thei. Mipui sum tling khawm bothlau a awm thei a, chumi veng tur chuan theihtawp kan chhuah. Opposition party-in kan tih tur dik tak kan ti a ni," a ti. 

MPCC Media Secretary sawi danin, tun hnaiah Tripura-ah Covid-19 test kit leh hand sanitiser lei chungchangah cheng nuai 34 tihchingpen a awma hriat a nih avangin Health Secretary leh National Health Mission (NHM) Director-te an hna aṭanga chawlhtir an ni. Manipur-ah pawh N95 mask leh hmanraw dang ṭha tâwk lo supply vangin Health department official eng emaw zat thubuai siamsak an ni.

Congress party chuan thuchhuah siamin, ramin hun khirh tak kan hma­chhawn mek karah corruption-in kua a hreuh theih avangin fimkhur a ngaih thu an tarlang a, "Mizoramin mautàm a hmachhawn hnuhnung ber pawh khan BAFFACOS hnuaiah cheng nuai 12,500 sanction a ni a, pawisa hman danah sawiselna a tam hle a ni," an ti.

•    PPE lei dawnah approved supplier leh PPE siamtu sorkar pawmpuina neite hnen aṭangin proper channel (kalphung dik)-a lei a ni lo. Hei hian sorkar thuneitute leh PPE hralhtute inkarah corruption awm theihna tam tak a siam bakah, kalphung pangngai anga lei a nih loh avangin a chhia thleng leh theihna kawng a tipinga ngaih a ni. State Purchase Advisory Board a paltlang lo a nih phei chuan dan bawhchhiatna lian tak a awm tihna a ni ang.

•    Delhi aṭanga PPE leh bungraw dang lei nan Mizoram sorkar pawisa Rs. 99,95,200 hman nia hriat a ni a, thlawhna hire (hman) nan ringawt pawh Disaster Management & Rehabilitation sum Rs. 16, 23,000 hman a ni. Pawisate hi mipui chhiah pek tling khawm a ni a, awmze nei taka hman tur a ni. Pawisa heti zat sénga bungraw lei zingah hman tlak loh tam tham tak a awm hi a pawi tak zet a, mipui pawisa nuai tam tak awmze nei loa a luan ralna kawnga mawhphurtute hrem ngei tur an ni.

•    PPE hi Covid-19 dona kawnga frontline-a awm damdawi lama thawkte hman tur a ni ber a, hetianga PPE chhia lei ṭeuh hi damdawi lama thawk zawng zawngte tan a him lo a, dinhmun hlauhawm takah Mizoram sorkarin a dah tihna a ni a, a pawi tak zet a ni.