Kolkata-ah Mizo 2-in Covid-19 an kai
Kolkata-a AMRI Hospital-a awm Mizo damlo pahnih, mipa puitling ve ve chuan Covid-19 hripui an vei tih hmuh chhuah a ni a, Covid-19 kaite enkawlna hmunah enkawl zui nghal an ni.
Kolkata-a Mizoram sorkar official-te'n Vanglaini palai zawhna chhanga an sawi danin, Covid-19 kai pahnih zinga pakhat zawk chu April 26-ah a swab lâk niin, April 30, Nignani zanah result hriat a ni a, pakhat dang chu April 27-ah sample lak niin, nimin zing khan result hriat ve leh a ni. AMRI Hospital hi Covid-19 testing centre a nih loh avangin result a chhuak har deuh niin an sawi.
Damlo pakhat zawk chu damdawi-ina a awmna bula miin hripui a vei tih hmuh a nih avangin damdawi-in ward dangah dah hran nghal a ni a, a swab sample lain, endik tura thawn zui a ni.
Damlo pakhat dang leh chu damdawi-in aṭanga chhuahtir tawh niin, Mizoram House-ah a awm a, mahse, a ziaawm theih loh avangin damdawi-inah dah luh leh tum a ni a, Covid-19 veite awm dan anga a awm bawk avangin damdawi-ina dah luh leh a nih dawnah sample lak niin, endik a ni. Covid-19 kai hmuh chhuah tharte hi AMRI Hospital-in Covid-19 veite enkawlna tur bik an siamah enkawl nghal an ni.
Damlo pakhat zawk, damdawi-ina chhuahtir tawh hnua damdawi-in veka admit leh chu damdawi-ina a awm loh laiin Mizoram House-ah a awm avangin, sorkar thuneitute'n contact tracing an ti nghal a; a awmna Mizoram House-a awm ve dangte chu endik vek tura ruahman mek niin, sorkarah an thehlut tawh a ni.
Covid-19 vei hmuh chhuah thar avang hian Mizo mipui leh Kolkata-a awm Mizote chi-ai lo turin Health minister Dr R Lalthangliana chuan a chah a, West Bengal sorkara Health Secretary a biak nghal thu sawiin, "Sorkarin theihtawp chhuahin a ṭul angin hma a la nghal a ni. West Bengal Health Secretary pawhin theihtawp chhuaha buaipui an tum thu min hrilh," a ti.
Dr R Lalthangliana chuan, West Bengal chief minister Mamata Banerjee, Health & Family Welfare department enkawltu ni bawk hnenah lehkha a rang thei ang bera a thawn dawn thu a sawi a; hripui kai hmuh tharte chu an hming leh nihna tilang thei reng reng social media leh thil dangah thehdarh lo turin mipui a chah nghal bawk.