Insawisa lai video-ah thubuai ziak lut Sawisatua puh man a ni

Mizoram State Commi­ssion for Women (MSCW) chuan tun hnaia social media-a mipa pakhatin hmeichhe nau paw lai a sawisa lai thlalak (video) darh chungchangah suo moto-in thubuai an ziak lut.

Mi sawisatua puh Lalramdinsanga (25) s/o SB Gurung (L), Siahatla-II, Siaha chu nimin khan police-in an man.

Police hotute aṭanga thu dawn danin, video darh leh mi sawisatu chu Mizoram Police, District Special Branch, Aizawlin an chhui zui a, Siaha lam mi an ni tih hriat a nih hnuah Siaha Police Station OC bawhzui turin an ti. Siaha police-te chuan an bawhzui nghal a, mi sawisatua puh Lalramdinsanga (25), Siahatla-II chu an in aṭangin an man a, Siaha PS-ah lak nghal a ni.

Insawisak hun hi August 13, 2022 tlai/zan a ni a, Lalramdinsanga lakah hian IPC 323, 324, 352, leh 498A hmangin thubuai ziah luh a ni.

Video darh chung­changah hian MSCW chuan, "Video-ah hian Mizo ṭawng an hmang a, chuvang chuan he thil thleng hi Mizoram chhung ngeia thleng nia ngaih theih a ni. Video-a lang chin bâkah hian thil tam tak, hmeichhia leh naupang/nausên chungah hian kut inthlakna leh hleilenna dang a thleng ngeia ngaih theih a ni. Hetianga insawisakna thleng hi MSCW chuan a ngai thutak hle a ni," an ti.

Kut inthlak lai video darh chu social media-a tarlan zui zel a nih loh nan video kawltu zawng zawng, sorkar thuneitute tih loh chu paih vek turin MSCW chuan an ngen a ni. Video-a lang hmeichhe nau paw chungah hmeichhe zahawmna leh dikna chanvo tihbawrhbànna nasa tak a thleng ngei nia an ngaih thu tarlangin MSCW chuan, "Thubuai chhuitu lam aṭangin DGP, Mizoram chu opposite party no. 1 atan ziah luh a ni a, Protection of Women from Domestic Violence Act, 2005 chungchanga mawhphurhna latu Women & Child Development department aiawhin Director chu opposite party no. 2 atana ziah luh a ni," a ti.

MSCW hian insawisakna thlengah hian suo moto-in thubuai MSCW case no. 45/2022 an ziak lut a; a taka thil thleng ngei a nih chuan pawikhawihtu chu a rang thei ang bera man a, dan anga hrem a nih theih nan theihtawp chhuaha hma la turin Mizoram police an beisei a, a ṭul anga hma la turin DGP an hriattir a ni.

MHIP Gen. Hqrs. hruaitute pawhin, nimin khan Aizawl SP C Lalruaia an hmu a, kut thlaktu mipa chu zawn chhuah ngei ni se an duh thu an thlen. Aizawl SP chuan, video chungchang chu police-in an bawhzui thu a lo hrilh.

MHIP Gen. Hqrs. chuan thuchhuah siamin, hmeichhe chunga kutthlakna a thleng ṭhin chu an duh lo tak zet tih an tarlang a, "Kutthlaktu mipa hi dan anga thuneitute'n an hrem ngei theih nan, a awmna chin hria emaw chuan police-te a rang thei anga hriattir turin kan ngen a ni," an ti.

MSCW TARLAN ṬHENKHAT
1) MSCW chuan hetianga pawikhawihna hi hmeichhe chunga a thlen nawn tawh loh nan sorkara thuneitu hrang hrangte chu mahni zâwn ṭheuhah theihtawp chhuaha hma la turin a beisei.
2) A bik takin The Protection of Women From Domestic Violence Act, 2005 hnuaia protection officer leh service provider-te chu an huam chhung ṭheuhah in chhungkhura hmeichhe chunga hleilenna thleng thei veng tur leh, a thleng a nih chuan dan anga rang taka hmalak zui a nih theih nan theihtawp chhuaha hma la turin a beisei.
3) Protection officer leh service provider-te chu VC/LC, YMA leh MHIP-te nen mumal zawka thawhho dan kawng zawng turin a beisei.
4) WCD Director chu The Protection of Women from Domestic Violence Act, 2005 hnuaia mawhphurtute thuam chak a, district tinah mumal taka hna thawh a nih theih nan hmalak ngaite vil zui turin a beisei.
5) District tina protection officer leh service provider-te hnathawh mek dan kimchang leh harsatna an tawh mek nia langte bakah, an hming leh phone number kimchangte ni sarih chhungin MSCW-ah ziaka hriattir turin WCD Director beisei a ni.
6) Hmeichhe chunga hleilenna a thlen chángin phone number 0389-2335505, Women Helpline phone number 0389-2311271 & toll free number 181 leh Women Police Station phone number 0389-2310585-ahte hriattir vat tur a ni.
7) Video darh mek hi social media-a tarlan zui zel a nih loh nan video kawltu zawng zawng, sorkar thuneitute tih loh chu paih/delete vek tura ngen an ni.
8) Chawlhkar khat hnuah thubuai hi ngaihtuah leh a ni ang.