Lakhuihthei chíngtute an mangang Aizawla sum léngvâk a tlêm vang?

Tunlai hi lakhuihthei thar hun lai a ni a, Sialsuk khuaa lakhuihthei chíng­tute chuan an thar angte hralh zawhna tur an hmuh loh avangin an mangang hle. Lakhuihthei khâr chhâwng ṭhinte chuan Aizawlah sum léngvâk a tlem avangin an hralh ṭha thei lo niin an sawi.

Vanglaini thu dawn danin, Sialsuk khuaah hian lakhuihthei chíngte chuan pawl dinin, member chhungkaw 239 an awm mek. Nikum khan lakhuihthei quintal 6,800 an thar a, kuminah chíng an awm belh avang leh hma thar an lâk nasat avangin qtl. 10,000 chuang thar theih an inring.

Lakhuihtheite hi Aizawl aṭangin khâr­chhâwngin an la ṭhin a, kg. khat Rs 10-in an leitir ṭhin. Kuminah pawh Aizawl aṭangin khâr­chhâwngte'n la tho mah se, kum danga an lak ang zat an la thei tawh lo. Hetiang a nih avang hian chhungkaw ṭhenkhat chuan lirthei hmanga Aizawlah phur thleng in, hmun remchang apiang­ah an ṭhutpui ṭhin a ni.

Lakhuihthei eng emaw zat a ṭawih mek tih sawiin lakhuihthei chíngtute chuan "Khârchhâwng lam kan zawh lahin, 'Aizawlah sum léngvâk a tlem a, kum dang angin kan hralh thei lo' tiin min chhang. Sorkarin kan harsatnate hi min rawn ngaihtuahsak se kan duh hle. Kum dangah pawh harsatnate chu tâwk ve ṭhin mah ila, kumin ang em emin kan tâwk ngai lo," an ti.

Lakhuihthei chíngtute chuan an mangang tak zet tih sawiin, "Kan thlai thar chhuah ve ang pawh a hralhna kan hmu zo lo a ni. Huanah lakhuihthei lawh tur eng emaw zat kan la nei hlawm a, hralhna tur a awm loh avangin kan lo ngam lo," an ti a; tunlai hi lakhuihthei thar vanglai a nih thu an sawi.