Chief Minister-in Aizawl DC lehkhabu a tlangzarh

Chief minister Zoramthanga chuan August 15, Thawhṭanni tlai khan Aijal Club-ah Aizawl DC pisa buatsaih 'Picture through the Ages - A Documentation of the Journey of Aizawl : Its land, its art, its history, its people and their stories and its enigma' tih lehkhabu a tlangzarh.

CM Zoramthanga chuan, beng ringawta hriatna chu a nghet tâwk lo tih sawiin, "Mizo history benga hriat tihngheh nan mit ngeia hmuh theih leh ziaka chhiar theih tur kan lo neih belh leh thei ta hi a hlu tak zet. Lehkhabu hi ṭhangtharte tan hriatna tizautu leh lehkhabu râwn tlak leh rotling a nih ngei ka beisei," a ti.

Aizawl bawrhsap Dr Lalhriat­zuali Ralte chuan, DC pisain lehkhabu a buatsaih chhan sawiin; India zalenna hlutzia pholanna atan te, hmasawn dan lantirtu atan te, tun hma sap ho min awp hma leh hnua Mizoram chanchin chhinchhiah nan te, Mizo nun leh khawtlang ziarángte theihnghilh a nih loh nan leh ṭhangtharte'n an hmuha an chhawr ṭangkai theih nan te, zir mite leh khualzinte tan an hriatna tizautuah leh Aizawl district an hriat fiah zawk theih nan buatsaih a nih thu a sawi.

Lehkhabuah hian thlalak 600 chuang a awm a; tlangzarhnaah hian MLA pali - C Lalmuanpuia, H Biakzaua, Zothantluanga leh K Laldawngliana te, Aizawl DC ni tawh - P Rohmingthanga, IAS (Rtd) leh Vanlalngaihsaka, IAS (Rtd) leh mi pawimawh dangte an tel a ni.