ZPM Leader-in sum dinhmun a sawi ; Hmuh loh aiin beisei loh hmuh a tam - Duhoma

ZPM leader Lalduhoma chuan, Covid-19 avanga Mizoram sorkarin sum a hmuh tura a beisei a hmuh loh zat aiin, hmuh tura beisei loh a hmuh si a tam zawk daih tih a sawi.

Nimina ZPM party policy Vanapa Hall-a tlangzarhnaah thu sawiin Lalduhoma chuan, sum dinhmun chhiat chhanah Mizoram sorkarin Covid-19 vanga hmuh tura beisei cheng vbc. 2,632.58 a dawn loh chhuanlamah a hmang ṭhin tih a sawi a, "Dawn tur beisei, dawn si loh an sawi a, dawn tura beisei loh dawn an sawi duh lo thung. Kan dawn tura beisei loh Covid-19 vanga kan dawn hi cheng vbc. 6,025 chuang a ni a, beisei ang dawn loh lêt hniha tam kan dawng," a ti.

ZPM Leader chuan, cheng vbc. 2,632.58 dawn loh chu thuthar a ni lo tih sawiin, "February 24, 2022 khan Chief Minister-in Assembly House-ah a sawi daih tawh. Heta dawn loh a sawi hi kum 2019 aṭanga dawn loh zawng zawng belh khawm a ni a, thu hlui a ni. Dawn tura beisei dawn loh leh beisei loh dawn si hi kum dangah pawh a awm fo a, kum tawpah appropriation bill hmangin kan chingfel vek zel," a ti a; dinhmun sawi dawn chuan la chinfel loh sawi tur a nih thu a sawi.

Sorkar chhuanlam dang, Covid-19 vanga budget aṭanga sum hman chungchang Dr Vanlalthlana, MLA-in a sawifiah tih sawiin Duhoma chuan, "Covid-19 vangin budget aṭangin 1% pawh sorkarin a hman loh thu a tarlang a, MNF-in press release siamin, dâwt tiin sawifiahna an tarlang. MNF hian hripui léng do nan kum 2020-21 inkarah .30% leh 2021-22 inkarah .64% sên a nih thu an tarlang a, Dr Mathlana thusawi an nemnghet a ni," a ti.

Lalduhoma chuan, Post Devolution Revenue Deficit Grant (PDRDG) leh Share of Taxes-ah kum 2022-23 atana hmuh tur ang hmuh zel a nih thu sawiin, "Kan budget-ah hmuh tur aia hmanna tur tlemna (revenue surplus) cheng vbc. 1,419.70 awm tura dah a nih laiin, revenue surplus neih chu sawi loh, hmuh aia hman chhuah tamna (revenue deficit) cheng vbc. 1,685.1 kan nei tawh zawk," a ti a, beisei ang hmuh a ni chung pawhin sorkar a chêt fuh theih loh thu a sawi.

Sum indaih loh avanga sum pûk ngai tur (fiscal deficit) atan budget-ah cheng vbc. 1,210.44 dah a nih thu sawiin Lalduhoma chuan, "Thla thum chhungin budget-ah ruahman aia tam cheng vbc. 1,683.19 pûk hman a ni. Kum tluana pûk tur aia tam thla thum chhungin kan pûk daih tawh. Ways and means hmanga pûk tura ruahman pawh cheng vbc. 1,000 a nih laiin, thla hnih chhung vel lekin cheng vbc. 903 pûk a nih leh hman dêr tawh a ni," a ti.

ZPM Leader chuan, leiba rulhna atan mi dang sum pûk a nih thu sawiin, "Kawmchhak pa leiba rulhna atan kawmthlang pa pawisa kan pûk ṭhin," a ti a; Mizoram sorkar kalphung chu bang chhak sât thlaa bang thlang pinna atana hman a nih ber thu a sawi.

LALDUHOMA THUSAWI TLANGPUI
1) Sum dawn tura beisei Covid-19 vanga dawn loh vbc. 2,632.58 a nih laiin, dawn tura beisei loh vbc. 6,025 chuang dawn a ni.
2) Covid-19 atan budget aṭanga sum hman chungchanga MLA Dr Mathlana thusawi a dik tih MNF press release-in a nemnghet.
3) Kum 2022-23 ah beisei ang kan dawng reng chungin sorkar a che fuh thei chuang lo.
4) 2022-23 budget-ah revenue surplus cheng vbc. 1,419.90 awm tura tih a nih laiin, revenue deficit vbc. 1,685.1 kan nei tawh.
5) Kum 2022-23 budget-ah cheng vbc. 1,210.44 pûk tura ruahman a nih laiin, thla thum chhungin vbc. 1,683.19 pûk tawh a ni.
6) Leiba rulhna atan mi dang pawisa kan pûk leh ṭhin.