Thu thehdarh a dik lo tih BJP-in an sawi

BJP, Mizoram Pradesh chuan thuchhuah siamin, tun hnaia phai lam media ṭhenkhatin Indian Constitution thar buatsaih tum a nih thu leh India ram khawpui (capital) chu New Delhi aṭanga Varanasi, Uttar Pradesh-a sawn tum a ni anga tarlan chu thu dik lo a nih thu an tarlang.

Mizoram BJP chuan, Constitution thar buatsaih leh India ram khawpui sawn tumna a awm anga media-a tarlan chungchangah hian, "Mizoramah mi ṭhenkhatin BJP beihna hmanruaah sawi lutin, BJP-in Constitution thar an buatsaih, BJP-in Hindu-a min inlehtir vek an tum, tiin mipui tihṭhaih nan thu an vawrhdarh mek," an ti a, pawi an tih thu an sawi.

BJP chuan, Constitution chu Hindu, Muslim, Buddhist, Christian leh sakhaw dangte'n pawl chhung aṭanga an siam thar tur a ni lo tih sawiin, "Kan Kristianna chungchanga kan mithiamte'n Mizo mipui min sawiṭhaih fo te, kan rinna tinêp záwnga sakhaw danga inlet mai tur anga min zirtir fote hi a pawi kan ti a, kohhran mite thlarau châwm zawnga thusawi thei lote'n rinna kawnga hniam zawkte tithlabár zawnga hma la lo turin kan ngen a ni," an ti.

Mizoram BJP tarlan danin, Constitution tihdanglam leh khawpui ber sawn chungchanga The Times of India-a article chhuah anga sawiah BJP leh an kaihhruai sorkar nen inzawmna a nei lo a, BJP hming ziah lan a awm lo. Kum 1946-1950 vela Indian Constitution Drafting Committee tih loh chu Constitution thar siam turin drafting committee din a la awm ngai lo a ni.

BJP, Mizoram Pradesh chuan thu thehdarh chungchangah hian nimin khan Cyber Crime Police Station-ah FIR an thehlut a ni.