August thlaah hripui vei 2,507 hmu tawh

August 15, Thawhṭanni khan Mizoramah Covid-19 vei mi 78 hmuh chhuah a ni a, August thla chhungin mi 2,507 hmuh chhuah a ni tawh. Nimin khan hripui vei dam tawh mi 169 chhuahtir an ni a, Covid-19 vanga thi an awm lo.

Thawhṭannia Covid-19 positive hmuh thar mi 78-te chu mipa 34 leh hmeichhia 44 an ni a; rapid antigen test hmanga hmuh chhuah vek niin, swab sample endik 229 aṭanga positivity rate chu 34.06% a tling.

Nimin khan hripui vei dam tawh mi 169 chhuahtir an ni a; district tina chhuahtir zat chu - Lunglei district-ah mi 46, Saitualah mi 25, Champhaiah mi 24, Khawzawlah mi 22, Serchhipah mi 19, Siaha leh Lawngtlaiah mi pariat ve ve, Aizawl leh Kolasib-ah mi pasarih ve ve leh Hnahthialah mi pathum an ni.

IDSP record angin, Mizoramah Covid-19 vei 2,35,307 hmuh chhuah a ni tawh a, mipa 1,09,537 leh hmeichhia 1,25,770 an ni a, mipa aiin hmeichhia 16,233-in an tam zawk. Nimin tlai dar 5 thleng khan mi 2,34,038 (99.46%) chhuahtir an ni tawh a, mi 717 (0.30%) thi tawhin, enkawl mek mi 552 (0.24%) an awm.

Kum 2011 chhiarpui angin, Covid-19 vei hmuh tawh 2,35,307 chu state mipui zat aṭangin 21.45% a tling a; mi 1,000 zelah positive 214 an awm tawh ang a ni a, hripui vangin mi 1,00,000 zelah mi 65 an thi tawh ang a ni.